Trained Nurses’ Association of India (TNAI) Mizoram State Branch general conference vawi 19-na chu September 6 & 7 hian Aizawlah neih a ni dawn a. Thupuiah ‘The Future of Nursing: Leading Change, Advancing Health and Transforming Care’ tih hman a ni.
Nilainia conference hmanpuitu chief minister Zoramthanga chuan nurse-te hnathawh chu ropui a tih thu leh ram mipui hriselna kawnga tha thawhtu tangkai leh pawimawh tak an ni tih a sawi a. Nitina an hnathawhna leh eizawnna piahlam thil dangah nurse hmingtha leh chhuanawm tak tak an awm thin chu ropui a tih thu a sawi. Nurse-te hi an eizawnna leh hnathawh a nih bakah mihring puite rawngbawlna a ni tih hria a, anmahni pantu damlote hmangaihna nena enkawl zel tur leh tha taka dawngsawng thin turin a chah.
TNAI Hqrs. New Delhi atanga conference hmanpuitu secretary general Evelyn P Kannan chuan Mizoram nurse-te zingah thawhhona tha tak a awm chu fakawm a tih thu a sawi a. Trained Nurses’ Association of India hi kum 115 a upa, branch 34, member nuai 5 leh zirlai member 231303 nei mek a ni tih a sawi.
Conference an neih hnuhnung ber, kum 2019 hnulama Florence Nightingale Award dawngtu nurse pali – health supervisor (Rtd) Dengthangpuii (L), Kulikawn Aizawl; health worker Vanlalthuami, Lunglei Theiriat; staff nurse Vanlalrovi, Thingsulthliah PHC; ward superintendent (Rtd) C Zopari, Civil Hospital Aizawl te hnenah chief minister hian chawimawina thilpek a hlan a ni.
TNAI hi kum 1908-a din a ni a, Mizoram State Branch hi August 1964-a din a ni. Kumin September 1 thleng khan Mizoramah TNAI life member 3750 an awm a, district branch 7 awmin TNAI Mizoram office tur ram Ainawn Vengah TNAI Hqrs-in a leisak a ni.
Nurse-ten khawmpui hmang
