Tunhnaia Mixed Martial Arts inelna pahnihah Mizo fighter ve ve Lalnunsanga Chhakchhuak, tuna SPES Martial Arts academy-a training mek leh Hunthar Veng tlangval Lalngaihawmate’n an tumpui ve ve an tuktlawm.
Mizoram State Mixed Martial Arts Association (MISMA) professional fighter chherchhuah zinga hlawhting chho berte zinga mi, Chawnpui, Aizawl/ Khawzawl tlangval Nunsanga zawk hian MMA India sanction hnuaia South India-a professional fight night lian ber Hyderabad khawpuia zawh tak Legacy Fighting Championship 2-ah August ni 22 zan khan main event-ah Delhi pro-fighter tha Dushyant Singh chu 2nd round-ah Knockout-in a hneh a, 3-0-0 pro record a nei ta a ni.
Sangsanga an tih bawk hian mawi tak maia a khupa a KO avangin ‘KO of the night award’ a dawng tel nghe nghe.
August ni 22 zan vek khan Arunachal Pradesh lamah TMX gym-a training mek Ngaihawma chakin, MMA India sanction hnuai thoa India rama MMA leh K-1 professional fight night lian berte zinga mi, pro MMA grand prix huaihawttu awmchhun ni bawk Aturto 4.2 main event chu Mizo tlangval bawkin a chang leh a.
K-1 professional fight-ah hian Itanagar tlangval rorum leh lar tak Diyo Rimo chu Hunthar tlangval Lalngaihawma’n hnehsawh tak (unanimous decision)-in a hneh.
He event-ah hian International MMA & K-1 national referee & judge baka MISMA general secretary ni bawk Samuel Lalrozama chu Event Commissioner a ni pha ngat!
Rozama hi main event, co main event leh India vs Nepal international Pro MMA bout-ah a referee a; a kaihhruaina hnuaiah hian Meghalaya leh Assam official pahnih bakah national referee & judge pahnih – MISMA treasurer Lalthakima leh MISMA executive committee member Lalchhuanmawiate’n referee leh judge hna an thawk ve bawk.
Octagon inbeihnaah Mizo tlangval pahnih an chak
