Khawzawl District Water and Sanitation Mission Committee chu an chairman, bawrhsap K. Lalrohlua hoin Ningani khan an thukhawm a. District khaw tin ODF Plus Model Village-a hlankai thuai dan tur leh Jal Jeevan Mission-a hma lak zel dan tur an sawi ho.
DWSM member secretary, PHED executive engineer Liantluanga Chohte chuan Open Defecation Free Plus (ODF Plus) awmzia sawifiahin, India ram puma pawnlera inthiar an awm tawh lohna vawnnun chu a tum ber a ni tih a sawi a. Khawzawl district-a thingtlang khua 25 awm zinga khaw 24 chu ODF Plus Village an ni tawh a, ODF Plus Village la ni ve lo Neihdawn khua pawh Integrated Management Information System-a la upload fel a nih loh vang chauh a ni, a ti. ODF Plus Village a hmuna enfiah tur hian DWSMC member-te hi team hniha then an ni a; November thla chhung hian endik a, Mamit district dawta ODF Plus Model District hmasa ber nih thuai tum a nih thu sawi a ni.
JJM hnuaia in tina tui pek (Har Ghar Jal) chu khaw 21-ah pek tawh niin, khaw 4-a pek theih thuai beisei a nih thu pawh sawi a ni a. Har Ghar Jal la zawh fel lohna khaw pali – Kawlkulh, Vanchengpui, Chhawrtui leh Riangtleiah December 15 hmain pek tum nise an ti.
ODF+ a district khaw tin hlankai dan tur ngaihtuah
