Oil man sangin thil man tito
– Dr R Lalthangliana
Sawrkarin oil man a tih san avangin buh leh chawhmeh man bakah cement thlengin a to zui nghal tih MNF hruaitu Dr R Lalthangliana chuan a sawi.
Thawhtannia Sinlung Hills Council inthlan tura campaign MNF senior vice president chuan, ZPM sawrkarin oil man a tihsan chu MNF-in a do hrim hrim lo tih a sawi a. A man tih sanna a tam tham em avang leh inthlan campaign laia chhiah tihpun loh sawi fo thinten mipui an bum nasat vangin an duh lo tih a sawi. Chhiah chi hrang hrang tihpun chu mirethei zawkte rawkna a nih bakah an party mite inhaivurna a ni tih a sawi bawk.
Thil man a to tawh chuan a tlahniam tawh ngai lo nia sawiin, tuna thil man to chi hrang hrang hian khawsak harsa zawkte a la nghawng dawn chauh a. Lirthei chuan man leh sa man thlengin a la rawn to chhunzawm zel dawn tih a sawi a ni.
Kalphung thar sawrkarah ruatchawpte inenkawlna senso a tam tih Dr R Lalthangliana hian a sawi a. MNF sawrkarah khan CM adviser 2 leh SEDP Board 14 vice chairman leh an staff hlawh, kum 5 chhung atan cheng nuai 1248 sen a ni a. Inrenchem tura insawi ZPM sawrkarah hian CM adviser 5, cheng khat hlawh, OSD, joint secretary rank consultant, corporation chairman ruat an nih bakah MYC chairman leh AMC/LMC hlawh tihpunna nen kum 5 chhunga sum senso chu cheng nuai 13416.00 a ni daih a, kum 5 chhunga MNF sokar aia ZPM sawrkar senso tamna chu cheng nuai 12168 a ni daih tih a sawi.
Sinlung Hills Council-ah MNF official candidate-te thlantlin an nih chuan, state-ah MNF sawrkar lo mah se, an beisei leh rin aia an tihfuh tur thu a sawi bawk.
Oil man sangin thil man tito – Dr R Lalthangliana
