Olympic laiin covid kai infiammi an awm nual!
Women’s 1,500 metres freestyle-a medal awrh thei tura beisei Australian swimmer Lani Pallister telin Paris Olympic Games kal laiah hian infiammi Covid-19 kai hmuhchhuah an awm nual tawh a, Thawhlehni daih tawh khan Pallister phei hi chu inelna hmachhawn thei loin a inhnukdawk hial a ni.
Kum thum kaltaa Tokyo Olympics kha hripui avangin inkhuahkhirhna khauh tak hnuaia kalpui niin, covid virus avang khan infiammi engngemawzat chu Games atangin an inhnukdawk a, entu awm mumal lote khan intihsiak kalpui a ni a, hripui a reh tawh emaw tih laiin Paris Games-ah pawh Covid-19 a inlar thar leh a, infiammi hripui kai an hmuchhuak nual a, entu mipui lam pawhin mask an vuah leh fur tawh!
Australian swimmer Pallister pawh hi covid kai zingah telin, medal a awrh phak beiseiawmna women’s 1,500 metres freestyle-ah a inlan thei lo a, vawiin atanga tan tur 4x200m freestyle relay inelna tal a hmachhawn theih beiseiin a room lama inkhunghrang tur leh awmhahdam tura thurawn pek a ni a, vawiin hian intihsiak hmachhawn turin a dam hman dawn em hriat hman a ni rih lo.
100 metres breaststroke gold awrh pha lo chiaha American Nic Fink nen silver medal an awrhdun atanga nikhat liam rualin British swimmer Adam Peaty pawh Covid-19 test-ah a positive a; kum 29-a upa Peaty hian Instagram lamah tunkar tawp lama team relays hmachhawn theih a inbeisei thu leh chu mi tura a inenkawl fat fat thu a tarchhuak.
Opening ceremony hma ni tlemte chauh awm tawhah khan Australian women’s water polo player thenkhatte pawh covid test-ah an positive hlawm a, team member dangte nena inpawh lo tura khunghran an ni.
Tarlan tawh thin angin, Tokyo Olympics pawh kha Covid-19 avangin a hunah an kalpui thei lo a, kum khata tihkhawtlai niin, 2022 Beijing Winter Olympics erawh inkhuahkhirhna khauh tak hnuaia kalpui a ni.
Paris 2024 hi hripuiin khawvel pum a tuamchhuah hnua Olympic nghah leh hmasakber niin, Paris-ah hian Covid-19 chungchanga inkhuahkhirhna khauh engmah siam a ni lo a, kai tawk an awm hnu pawh hian inkhuahkhirh viau tumna a awm hran lo niin a lang.
Paris 2024 chief communications director Anne Descamps chuan an inkaihhruaina dang ding lai (protocol) angin infiammi hri kaite chu mask vuah tura beisei an nih thu leh mitinte chu hrinpui chungchanga hriatbel tawh ang kalphung tha ber zawm tura an hriatnawntir (remind) thu a sawi a, covid dinhmun an thlithlai rengna zawn atangin France ramah positive case a sang lo tih a tarlang tel.
Hetih lai hian British swimmer Jacob Whittle chuan Games leh sawrkar thuneitute atangin dan khauh zawk awm lo mah se an team lam chuan fimkhurna kawng khauh takin an zawh reng tih a sawi a, an thlen chin apiangah fai taka kut an sil zel thu leh tui hleuh lai tih loh chuan mask pawh tha taka an vuah thin thu a sawi.
Team Canada chief medical officer Mike Wilkinson pawhin covid laka invenna an ngaipawimawh tih a sawi ve bawk.
Olympic laiin covid kai infiammi an awm nual!
