Mipuiin information tha an hriat zung zung theih nan District headquarters tinte chu optic fibre hmanga internet chak zawk pek tum an ni tih Information & Communication Technology minister Dr Vanlalthlana chuan a sawi.
Mizoram Information Service (MIS) officer-te tana buatsaih ni hnih awh tur, In-House Training programme chu Ningani atang khan tan a ni a. A hawnna hmanpuitu Information & Public Relations minister Dr Vanlalthlana chuan district headquarters tinte optic fiber hmanga internet chak zawk pek tumna chu mipuiin information an dawn zung zung theih beiseina leh information tha an hriat thuai chu thutlukna tha leh dik siam kawnga pui theitu pawimawh tak a ni dawn tih a sawi.
News bakah scheme tha tak tak leh thuthar, mipui hriattir nghal thuai ngaite puanzar kawngah tunlai thiamna tun aia nasa zawka chhawr tangkai a tul tih sawiin, MIS officer-te chu hemi kawngah hian ngaihtuahna senga tan lakpuiah a sawm.
Social media kaltlanga thu belhchian dawl lo leh mipui tichiai thei vawrhdarh a nih changa mipui ngaihven ber chu sawrkar thu puangtu I&PR thuchhuah a ni tih sawiin, sawrkar thuchhuake chu rintlaka ruat a nih avangin dik leh felfai taka ziah tum turin a fuih MIS officer-te chu tunlai thiamna chhuak thar ngaihven a, chhawr tangkai theia insiamrem thiam tur leh sawrkar duhdan leh hmachhawp hlenchhuah a nih theih nan ngaihtuahna seng turin I&PR minister hian a chah a ni.
Training-ah hian I&PR secretary Betsy Zothanpari Sailo, district hrang hranga MIS officer-te bakah Directorate of I&PR hnuaia MIS officer-te an tel a. Sawm bikten MIS officer-te hriat tur pawimawh hrang hrang bakah office hna kentel tul an zirtir dawn a ni.
Optic fibre hmangin District Hqrs tinah internet chak zawk pek tum
