Osaka Wimbledon comeback dangchattu Navarro

Osaka Wimbledon comeback dangchattu Navarro
Wimbledon Championships kal mek ni thumnaah Nilaini zan khan American Emma Navarro chuan nau a hrin hnua All England Lawn Tennis and Croquet Club, London-a grass-court grand slam khela kirleh Naomi Osaka chu women’s singles second round match pakhatah minute 58 lek chhungin 6-4, 6-1-in a vaw tla.
Vawili lai Grand Slam champion ni ve tawh Osaka hian thla 15 lai nau neih chawlh a hman hnuin kumin January thla khan tour-ah a kirleh a, Wimbledon-ah beisei a la pha lo.
Japanese superstar tan tun kha kum 2019 hnu lama Wimbledon a khelh leh vawikhatna niin, he tournament-a vawili a inlan tawhah third round a la pel zo lo chhunzawm zel!
Kum 26 mi Osaka hian Thawhtanni khan a bultanna inkhelah world number 53 Diane Parry of France hneh hram mah se Centre Court roof hnuaiah unforced error tum 16 ngawt neiin American Navarro a paltlang zo ta lo a ni.
Russian Diana Shnaider hmachhawn leh tur 19th seed Navarro tan All England Club-a third round a luh vawikhatna niin, second round paltlang manah pound 143,000 pounds (USD 182,150) chu a hlawh tawh phawt a, American billionaire fanu tan chuan a tam hran lo mai thei!
Second round match dangah American ve bawk Coco Gauff pawhin Romanian qualifier Anca Todoni laka 6-2 6-1 hnehna nuamsa changin Wimbledon third round a lut a, nikuma first round a paltlang zawh loh boruak nen chuan a inang ta lo.
Kum 2019 leh 2021-a he hmuna fourth round lo thleng ve tawh second seed Gauff hian British qualifier Sonay Kartal a hmachhawn leh ang.
Kum 20 leka upa Kartal tan France player Clara Burel hneha third round luh kha a career-a hnehna lian ber a la ni.
American chetthat ni hian 11th seed Danielle Collins pawhin 6-3 7-6 (7-4)-in Denmark player Clara Tauson a hneh ve bawk.
Chak langsar dang zingah Ukrainian 21st seed Elina Svitolina chuan Poland mi Magda Linette lakah rim taka thawkin 7-5 6-7 (9-11) 6-3 hnehna a chang.
2019 US Open champion Canadian Bianca Andreescu pawh New York hlawhtlinna a chan hnu khan hliamin bawhbuai chho hle mah se 3rd round lut zingah kan hmu a, 6-3 7-6 (7-5)-in Czech 26th seed Linda Noskova a paltlang.
Andreescu hian 7-6 (7-5) 6-2-a Greet Minnen hnehtu Italian seventh seed Jasmine Paolini a tum leh ang.
Britain player Emma Raducanu pawhin Belgian Elise Mertens laka 6-1, 6-2 hnehna changin 2nd round a paltlang ve bawk.
2021 US Open trophy a sualchhuah nawlh hnua fitness chungchanga buai chho ta deuh reng British wildcard Raducanu tan tun kha Flushing Meadows title a lak hnua Grand Slam third round a luh leh vawikhatna niin, kum 1977 champion Virginia Wade hnu lama Wimbledon-a British women’s singles trophy la leh thei hmasaber nih a tum mekna kawngah hmabak a la nei hlek!
US Open hmeichhe singles title la ve tawh dang Sloane Stephens erawh 6-1 6-1-in Diana Shnaider chuan a hlapchhuak thung.