Oscar-ah chuan hetiang hi a awm ve châwk a ni a, award dawng tura rinkai tak tak dawng ta si lo an awm laiin, award dawng tura rinkai lem lo che tha ta phian te pawh an awm fo tawh. Kuminah pawh hetiang boruak hi sawi tur a awm ve leh nual mai.
Best Actress-ah hian Killers of the Flower Moon changtunu Lily Gladstone chu award dawng tura rinkai niin, ani hi Native American zinga he category-a award dawng hmasa ber a ni thei mai dawn emaw an tih laiin award hi Poor Things chantunu Emma Stone-i’n a dawng ta zawk.
Killers of the Flower Moon hi che tha tura rinkai, mahse, beisei pha ta lo a ni a, kumin Oscar nomination-ah pawh category 10-ah a lang a, mahse, award pakhatmah a dawng lo. He film hi Hollywood director hriathlawh berte zinga mi Martin Scorsese kutchhuak a la ni zui. Martin Scorese hi Oscar-ah hetianga chet fuh loh tum lo tawng zawng zawng tawh a ni a, tun hi nomination 10 nei chunga award pakhat mah dawn loa, kut ruaka a film siam an hawpui tak tum hi vawi thum a tawnna a ni ta.
Bradley Cooper film siam ‘Maestro’ pawhin nomination pasarih neiin, award pakhatmah a dawng lo tlat. A film siam hmasa zawk ‘A Star Is Born’ pawh khan nominaton pariat neiin, award pakhat chauh a dawng tawh bawk. A mimal ang pawhin Cooper hian Oscar nomination 12 nei tawhin, award a la dawng lo cheu a ni!
Japanese film ‘The Boy and the Heron’-in best animated feature film a dawng nawlh mai a, he category-ah hian ‘Spider-Man: Across the Spider-Verse’ chu award dawng tura rinkai zawk a ni a, mahse, he Japanese animated film hian rin loh takin award a dawng ta zawk tlat. He film siamtu Hayao Miyazaki hian kum 21 kalta khan he category-ah tho hian ‘Spirited Away’ film hmangin award a lo dawng tawh a, ani hi US ni lo, ram danga piang zinga he category-a award vawi khat aia tam dawng thei awm chhun a la ni.
Barbie pawhin nomination pariat neiin, award pakhat chauh a dawng a, he film hi 2023-a film tlangzarh zinga sum lalut hnem ber a ni nain, Oscar-ah hian box office lama sum lakluh tam hian kawngro a su thui vak thin lo, tun kum nga chhung chu kum khat chhunga film sum lalut hnem ber ten Oscar pakhat aia tam an dawng thei tlat lo.
Oscar-a rin aia che tha leh rin aia beisei pha lo te
