Mizoram Public Service Commission chuan anmahni kaltlanga hna diltute tum khat in-register a hna an dil apianga an rin zui theih tur, One Time Registration (OTR) tihtawp chu hna diltute hmakhaw ngaih avangin tih tawp chi a ni lo tih an sawi a. OTR dodaltu Mizo Zirlai Pawl chuan candidate-twew tibuaitu a nih avangin rinrawla neih chi a ni rih lo tih an sawi ve thung.
MZP Gen. Hqrs. in MPSC kaltlanga hna diltu thenkhat nen an sawiho hnua thil phut neia MPSC an nawr meknaah, Commission hotute chuan OTR tihtawp a niha hnaruak a awm apianga a hrana document pawimawh thehluh thar zel ngai chu hna diltute hmakhua thlirin pumpelh tir hram an duh a, OTR chu tul loa hun khawhral titlemtu, candidate-te tihsual palh vengtu, document pawimawh humhimna a ni tih an sawi.
OTR-a document upload kim loh avanga hnawl, offline-a document thehluh hun siamsak tur leh written exam-a tling tawh, OTR-a document upload kim loh avanga hnawl tawhte tana offline-a document thehluh hun siamsak tura MZP-in a phut pawh, an phut anga tihhlawhtlin a nih chuan, hna hmu tawh mi engemawzat a tibuai dawn a. Appointment pek tawh tih buai thar leh chu thil diklo nasa tak vang a nih chauh loh chuan Law Court pawhin a duh loh thin a ni, tiin, thil tih chi loha ngaih a ni tih a sawi.
OTR tihtawp emaw OTR-a document uplaod kim lote avanga offline-a document thehluhna hun hawnsak emaw a nih chuan MPSC chu tute emaw hamthatna tur bik chauh ngaihtuahna avanga thil ti a ang dawn tih MPSC hotute hian sawiin, danpui Article 14 leh 16 palzutna a ni thei dawn tih an sawi a ni.
OTR-a document upload lo emaw upload tlai emaw avanga dilna hnawlsak thenkhat, Gauhati High Court Aizawl Bench-ah zualko mek an awm a. Court thu inchiah lai a nih avangin court-in thutlukna a siam hma chuan an kal dan tihdanglam ngawt chu a remchang lo tih MPSC hotute hian an sawi bawk.
MZP Gen. Hqrs. chuan MPSC insawifiahna hi chhangletin, MPSC-in online portal thar hmanga 2025 June atanga hna a lak hrang hrangah candidate-te buaina tawh zinga langsar tak OTR system chu rinrawla neih ngam chi a ni rih loa, MPSC hotute nen ngeia demonstration an tihaah pawh, OTR-a candidate-te document upload chu duh anga a lo capture thin loh avangin document check mumal awm loin candidate valid list tarchhuah a ni mai thin a, written result chhuah vek tawh leh interview tura koh tawhte pawh OTR-a document upload kim loh avangin reject an nih phah thin tih a sawi.
‘Hei hi MZP chuan reject chhan tlingah a ngai loa, online portal famkim tawk loh avanga candidate-te tawrh tir daih hi dik theiah a ngai lo. MPSC online portal that tawk loh vang leh a that tawk lohna ang anga MPSC-in instruction mumal tak a pek bawk si loh avangin MPSC thiam loh liau liauah a ngai a, candidate-te harsatna hi chinfel sak ngei tur leh MPSC chu an tih dik tawk lohah tang tlat loa, inpawmthiama hma sawn zel turin MZP chuan a beisei a ni,’ a ti.
Hetiang buaina tawk, rinhlelh nachang hrelo, tlin inbeisei rih lo leh MPSC lama zawtfiah lo chuan, reject an nih leh nih loh an inhre dawn loa, MPSC lamin interview tura koh turte written-a tling chauh manual-a document an check avangin, document upload kim loh avanga reject chu, MPSC-in hna dilna lut atanga buaina tawk za zela teha a san loh thu sawi mah se, reject nih inhrelo tam tak an awm vang a ni thei dawn tih a sawi a ni.
Hna hmu tawh (appointment pek tawh) tih buangbar thar chu MZP-in MPSC hnena a ngenna a ni loa, a ngenna zawk chu, thil kal tawh, thil liam tawh te (appointment pek tawh) ni loin, tuna candidate buaina tawk mek, recruitment process kal meka MPSC-in interview a la conduct lohnaah candidate-te chance siamsak tur leh, nakin lawka OTR avanga buaina la tawk leh mai turte laka chance pe tura ngenna zawk a ni tih a sawi bawk.