Rocker Ozzy Osbourne tan hian a la tawn ngai loh thil hi a tam tawh vak lo mai thei, mahse, a la tawn ngai lo, tawn ve ngei chak pakhat a nei a, cu chu Academy Award (Oscar) dawn a ni.
SiriusXM Ozzy Speaks episode thar berah he rocker, kum 75 mi hian engtikah emaw chuan Oscar la dawn ngei a chak thu a sawi chhuak tlat mai. A co-host Billy Morrison chuan chawimawina a la dawn loh, la dawn ngei atan a duh si a neih leh neih loh a zawt a, rang takin Black Sabbath frontman thin hian “Oscar” tiin a chhang nghal var.
Ozzy chuan, “Eng award nge ka la dawn loh tih min zawt alawm,” a ti a, mahsem Oscar dawng tura lemchan lama kal kher a tul loh tu sawiin, “Chutiang a ngai chuang lo, Elton John pawhin a hla avangin pakhat chu a dawn tawh kha,” a ti bawk.
A tak takah chuan Elton hian Oscar pakhat mai ni lovin pahnih a dawng tawh a, best original song-ah a ve ve a dawng. A hmasa zawk chu The Lion King film hla ‘Can You Feel the Love Tonight?’ avanga1994-a a dawn a ni a, a pahnihna chu 2019-a ama biopic Rocketman hla “(I’m Gonna) Love Me Again” avanga a dawn a ni thung.
Ozzy sawi takah chuan 2019-a a chetsualnaa spinal injury a neih avangin a la dam chiang thei lo va, mahse, he accident avang hian rimawi chawlhsan a tum chuang lo ni a sawiin, album pakhat tal chu la khawr pum leh a, tour leh ngei a la tum niin a sawi bawk.
Ozzy hi 2024-a Rock and Roll Hall of Fame a lakluh tur zingah a tel a, tun tum chu solo artist anga lakluh a ni dawn a, 2006 khan Black Sabbath angin hall of fame-ah hian an lo seng lut tawh bawk a ni.
Ozzy-a’n Oscar dawn a chak
