Pahnihnaah Manchester City

Inrinni zan khan English Premier League-ah inkhel pahnih a awm a, Manchester City chuan harsa taka Newcastle United hnehin, pahnihnaah an inhlangkai. Inkhel dangah Chelsea chuan an mikhual Fulham an hneh ve bawk.
Champion lai Manchester City hi pakuanaa awm mek Newcastle United hmachhawn turin an lenglut a. An lenluhna mualah goal thun hmasa mah se an chak zo lo teuh hle. Inkhel hmuhnawm takah chak zawk an awm thei dawn lo emaw tih hnuah City hian harsa takin hnehna an chang thei hram a, point thum hlu tak an hmu.
St James Park-ah Newcastle leh City ten inkhel hmuhnawm an lantir a, goal thun tuma an innawr tawn viau hnuin City in goal an thun hmasa. Kyle Walker cross tha tak chu Bernardo Silva chuan mawi zetin a pet goal a, minute 26-naah hmahruaina goal a thun. Goal thun hmasa zawkah tang mah se City an derthawng zui viau a, chawlhlawk hmain goal hnih an chhuah hman ta hial bawk.
Champion lai hneh ngei tuma tan khawh Newcastle in hlauhawm an siam fo hnuin goal an thun ta nge nge. Minute 35-naah Bruno Guimarães siamsak atangin Alexander Isak chuan goal a thun a, an si phurh a sut. 1-1 a nih hnuin inkhel a hmuhnawm zui viau a, Newcastle in goal an thun belh leh thuai. An si phurh sutna goal an thun atanga minute hnih hnu lekah Anthony Gordon chuan Burn siamsak atangin hma an hruai letna goal a thun a. 2-1 a hmahruai chungin chawlhlawk an hmang.
Chawlhlawk hnu lamah inkhel a hmuhnawm chhunzawm a, mualneitu Newcastle United in goal thun theihna hun tha an hlah fo a. Alexander Isak chuan hattrick siam theih hialna hun tha nei bawk mah se, a hun tha a hlah zel thung. City pawhin goal thun theihna hun tha an nei fo naa Newcastle si nghak Martin Dúbravka an paltlang hleithei lo. Pep Guardiola team te hian na takin an khingpuite an nawr zui char char a, goal an thun ta nge nge. Minute 74-naah Kevin de Bruyne chuan Rodri siamsak tha tak chu fing si, tha bawk siin lei hrulah a pet goal a, an si phurh a sut.
An inhnehtawk thar leh hnuin inkhel a hmuhnawm zual sauh a, goal thun theihna hun tha an nei ve ve a, an intihthaih tawn nasa hle. Goal a luh belh theih lawk loh hnuin hun tawp dawn hnaihah City an che fuh ta nge nge. Bench atanga lut Oscar Bobb chuan De Bruyne hnen atanga ball a hmuh chu inringtawk taka a lak tlang hnuin awlsam takin a pet goal a, hma an hruai nawn lehna goal a thun. Bobb goal thun hnu hian goal dang a luh belh thei tawh lova, City chuan harsa taka hnehna changin point thum an hmu ta a ni.
St James Park-a hnehna an chang hmangin City hian pahnihna Aston Villa an lehpel a, pahnihnaah an inhlangkai. City hian khelh 20 atangin point 43 an hmu a, hmahruaitu Liverpool chu point hnihin an phak lo mek. City in hma lam an pan laiin Newcastle United erawh chu an hnungtawlh thung. Newcastle hi an hnuai chiaha awm Chelsea in an lehpel a, 10-naah an tlahniam.
Inrinni zana inkhel dangah Chelsea chuan London a an elpui zinga mi Fulham an mikhual a, Stamford Bridge-ah harsa takin hnehna an chang. Chelsea hian gial an thun theih loh reng hnuin chawlhlawk dawn hnaihah penalty an hmuh hlauh. Reheem Sterling penalty hlawhchhuah chu Cole Palmer chuan minute 45+4-ah a pet goal a, hmahruaina goal a thun. He goal hmang hian hnehna an chang zui a, point thum hmuin table laihawl an chhuahsan a, pariatnaah an inhlangkai. Blues hian season kal mekah vawi 20 an khel tawh a, point 31 hmu mekin, hmahruaitu Liverpool chu point 14 zetin an phak lo mek a ni.