HSSLC result, tun hnaia chhuaka pakhatna khan Sir Arthur Conan Doyle a ngaisang a, PL Liandinga a ngaisang bawk. Chuti a nih chuan Sherlock Holmes a ngaisang tih a chiang e.
Lalnunpuii Sailo a ni a, HSSLC (Arts) stream-ah pakhatna a ni. Lehkhabu a ngaina a, a hun awl hnawh khahna ber a tling ang. A naupan lai atanga a tleirawl hnu thlenga a lehkhabu chhiar tawhah Sherlock Holmes ngaihnawm a ti ber.
“Ka chhiar ve tawhah chuan Sherlock Holmes hi ngaihnawm ka la ti ber ang. A ziaktu Sir Arthur Conan Doyle hi ka ngaisang a, a ziak thiam ka ti em em a. A lettu hi ka ngaisang, a let ngaihnawm ka ti lutuk,” a ti.
“Amah Sherlock Holmes hi a ngaihsanawm ka ti a. A tawng tlem a, ngawi rengin thil a thlir a, thil a chik em em a, a fing ka tia, a mizia hi a ngaihsanawm ka ti,” a ti bawk.
Sherlock Holmes hi a nu pu ta, bu hlui pui pui a chhiar thin a, “Mizo tawnga lehlin, ka hmuh phak chu ka chhiar kim,” a ti.
Naupan lai atanga lehkha chhiar thin a ni a, primary school-a a kal lai chuan Bible thawnthu a chhiar ber. A lo thang lian a, middle school a kal chuan Mizo pasalthate chanchin a chhiar tawh. High school a kal laiin Sherlock Holmes-ah a lut a, pawl 11 leh pawl 12 a nih chuan life skill lam te pawh a chhiar. A tleirawl hnuah Dr C Lalhrekima lehkhabu a ngaina a, a hlawkpui thu a sawi.
“Lehkhabu chhiar hi a nuam ka ti a, hun awl hnawh khah nan ka hmang bawk a,” a ti a, “Lehkhabu chhiar hi ka hlawkpui. Min tihawizau a, hriatna a tizau tih mai piahah hian khawhawi a tizau,” a ti bawk.
Bible a chhiar thin a, lehkha zir dawnah leh zan mut dawnah te a chhiar thin. Bible hi amah tichaktu a nih thu a sawi; “Nervous hma chi ka ni a, thil te thamah pawh ka zam thin a. Chutianga ka zam chang chuan ka rilruah Bible chang a lo lang a, ka hlawkpui thin, mahni rau rauvah ka chak phah thin,” tiin.
Pakhatna kha Sherlock Holmes ngaisangtu
