Tunlai khawvelah mobile phone tel lovin a awm theih loh a ni ber a, tunlai khawvel hi chu social media khawvel a ni ti hialin an sawi thin. Mi engemaw zatin mobile phone leh internet an chhiatpui a, mi engemaw zatin an hlawkpui bawk. Mihring hi a lo inan loh theih khawp mai!
Tun hnaia result chhuak HSLC-a pakhatna PC Lalthakimi chuan mobile phone a nei a, tangkaipui a inti. Khawih nasa a inti lo a, inthunun thei pawh a inti. “Sikul kal lai vel chuan ka khawih vak lo a, week end velah ka khawih deuh ber,” a ti.
“Phone hi zirnaah ka tangkaipui; kan zirlai hi youtube-ah te ka en thin a,” a ti a, youtube-ah hian a ‘search’ (zawng) tawp a, chu chu a bih kual thin tih a sawi. Google-ah a zawng thin bawk a, sap tawng thumal a awmzia a hriat lohte en nan a hmang thin. News en nan a phone hi a hmang thin bawk.
HSSLC Arts stream-a pakhatna Lalrammawii Tochhawng pawhin phone hi a hmang tangkai a, “Ka tangkaipui a, lehkha zir nan ka hmang thin,” a ti.
“Kan zirlaiah ka thiam loh en nan ka hmang a, home work ka tih dawn te hian, ka thiam loh chuan youtube-ah ka zawng a, ka google thin bawk a,” a ti.
Mobile phone hi dictionary atan a hmang a, sap tawng thumal a hriatthiam loh en nan a hmang thin. Internet-ah news a en thin a, youtube-ah a en thin a, a ziak a chhiar thin bawk.
“Ka mamawh loh lai chuan ka dah bo thin,” a ti a, chutih rual chuan khap ngaia a awm chang a awm thu sawiin, “Ka chhungte’n min khap chang a awm,” a ti.
MPSC buatsaih combined examination-a pakhatna (MCS topper) Samuel Malsawmzuala pawhin mobile phone hi tangkaipui a inti a, coaching academy tluk hialah a ngai.
“Tun tum exam-ah khan ka inbuatsaihna zawng zawngah zaa 90 vel chu internet a ni ang. Internet ka hmang nasa a, phone hmangin ka khawih nasa,” a ti.
Inthunun theih loh chang a neih thu a sawi a, a phone a swich off tawp chang a awm thu a sawi. Phone-ah hian games a khel thin a, ti mah maha a inhriat chuan a games khelh pawh a uninstall thin thu a sawi.
Pakhatnate’n Mobile Phone hmang tangkai
