Pakistan fur ruahin chhiatna a thlenah mi 21 thi leh

Pakistan fur ruahin chhiatna a thlenah mi 21 thi leh
Pakistan-a fur ruah sur avanga chhiatna dang thleng tharah mi 21 vel an thi leh a, kar hmasa atanga tui lian leh lei min avanga thi chu mi 400 chuang ni tawhin an ram chhung hmun tam tak chhiatnain a la tuam.
National Disaster Management Authority (NDMA) chuan Nilaini khan hmar lama Gilgit-Baltistan-ah mi 11 leh Pakistan-a sumdawnna khawpui, Karachi-ah mi 10 an thi leh tih an sawi a. Heng mite hi ruah sur nasa tak kara electric-in a man leh in chima thite an ni.
Mihring maktaduai 20 chuang chenna, Karachi-ah hian khawchin zirtuten Inrinni thleng ruah a la sur nasa dawn tih an sawi lawk avangin sikul khar a la ni rih a. Sindh-a chief meteorologist Amir Hyder Laghari-a chuan khawpuia tui a len nasat chhan hi ‘thil din a that tawk loh vang’ niin a sawi.
Khawpuia pipe leh luikawr upa tawh tak takte chu ruah sur tam a dawl zo lo va, khawlaiah tui a tlin phah nasa hle a. Mi chengte chu power leh phone inbiakna a chhiat bawk avangin an buai a zual hle.
Province thuneitute chuan district pahnihah in 40 atanga 50 vel a chhia tih an sawi a. “Tun thla tawpah ruah hi tha tharin a lo sur leh ang,” tiin NDMA Chairman Inam Haider Malik-a chuan a sawi.
Hmar lama Khyber Pakhtunkhwa province chu a tuar na ber niin Ningani kal ta atang khan mi 350 chuang an thi tawh a. Thuneitute leh sipaiten sabereka khuangkaih leh lei minin khua a hnawla chin hriat lohva la awmte an zawng mek zel a. Excavator hmangin lui leh tui lianna pingte then a ni bawk.
“Relief camp siamin damdawi mamawhte pek an ni a. Ei tur ro chi leh puan in pek an ni bawk,” tiin army Colonel Irfan Afridi chuan Buner district-ah AFP news agency hnenah a sawi a, tun hnaiah helai hmunah hian mi 220 chuang an thi tawh a ni.
“Naupangten an hlau va, hlauh vangin zan pawh an mu thei lo,” tiin relief camp-a thawk Anjum Anwar-a chuan a sawi a. “Tui lian hian kan khawsakna zawng zawng a tichhe vek a ni,” a ti.
Fir hun an tih, June leh September inkarah hian Pakistan-a hmar lam tlangram leh chhim lam phaizawlte chu tui len mai theihna hmun langsar a ni a. Thuneitute chuan ruah hi September thla laihawl thleng a la sur dawn tih an sawi.
Kumin furah hian mi 750 chuang an thi tawh tih an sawi a. Pakistan hi khawvela sik leh sa inthlak avanga khualrel chhiatna tuar na thei ber tur zinga telh a ni a, tun hnaiah khaw awm dan uchuak tak tak a thleng nasa hle a. Kum 2022 pawh khan tui lianin an ram hmun thuma thena hmun khat chimin mi 1,700 chuang an thi.