Pathianni zan khan Dubai khawpuiah Cricket a inelna lian Asia Cup final khelh a ni a, inkhelh hmuhnawm takah India chuan Pakistan an hneh a, a trophy kawl mek an humhim.
Final-ah Pakistan in ball a vaw hmasa a, bul an tan tha hle. Pakistan tana bul tantu Sahibzada Farhan chuan ball 38 atangin run 57 zet a siam nghal a. Farhan a kawppui Fakhar Zaman pawhin run 46 a siam bawk a, anni pahnih inkawp hian run 84 zet an thawkchhuak nghal der. Pakistan chetha lutuk dang turin India an fimkhur a, run an pe tam duh tawh lo. Pakistan hi over 19.1 khatah an out vek a, run 146 siamin target huphurhawm lutuk lo an hnutchhiah.
Inelna neih meka khel tha tak India vuak hun a thleng a, final boruak sangah bul an tan chhe hle. India innghahna Abhishek Sharma chuan ball 6 a hmachhawn atangin run 5 chauh a siam a, a out nghal ringawt. Chetha tura ngaih zinga mi Shubman Gill pawhin beisei a phak lova, ball ruk a hmachhawn atanga run riat chiah siamin a out zui ve leh bawk. India ball vawtute an beisei angin an vaw tha thei lova, Pakistan lakah an tlawm ngei dawn niin a lang hman.
Dinhmun chhe taka an din hnuin India in risk an la. Thih leh dam kara leng an nih tawh vangin India tan ball vawtu ten out pawh pawiti lovin ball vuak nat hrim hrim an tum a, six run leh four run a tam thei ang ber siam an tum. India hian risk an la fuh a, a tawpah an hlawkpui hle. India boruak hniam hman tak hi Tilak Varma chuan arawn chhem alh. Final-ah khel tha bera thlan Tilak Verma hian ball 53 a hmachhawn atangin run 69 zet a siam. Ball thum chauh awm tawha run khat la mamawh India tan Asia Cup 2025 final-a ball a hmachhawn hmasak berah Rinku Singh chuan run li a siam a, India a champion pui ta a ni.
Final hmuhnawm takah Pakistan hnehtu India hi Asia Cup-ah vawi kua an champion na a ni a, vawi hnih champion tawh Pakistan in trophy lian an la lak belh thei rih lo thung. Ropui taka an champion hnuin India hi lawmman semnaah an inlan zui duh lova, Asian Cricket Council president leh Pakistan Cricket Board chairman ni bawk Mohsin Naqvi hnen atanga trophy dawn an duh lo. Hei hian final boruak sanzia a tilang chiang hle. India an champion chiah hian India Prime Minister Naredra Modi pawhin, “Indona leh khelmual chhunga thil thleng pawh a ngai, India kan chak ve ve” tiin a tarlang hial nghe nghe a ni.
Pakistan hnehin India an champion
