Senator Anwarul Haq Kakar, Pakistan Balochistan province chhuak chu caretaker prime minister atana ruat niin nakuma Pakistan in inthlanpui a hmachhawn thlengin he dinhmun hi a chelh ang.
National Assembly thiah taka Prime Minister Shehbaz Sharif leh leader of Opposition Raja Riaz Ahmad tena inbiakna an neih hnuah Kakar hi an duhtlan a ni tiin Prime Minister’s Office chuan a tarlang a.
“Prime minister leh leader of opposition te chuan Kakar chu ruat a nih theih nan rawtna an siam chu president hnenah thawn a ni,” tiin PMO thuchhuah chuan a tarlang bawk.
Kum 52-a upa Kakar hi ethnic Pushtun niin Balochistan Awami Party (BAP) member niin BAP te hi Pakistan army thiltithei tak te nena inhnimhnai anga ngaih an ni.
Senator ni tir chauh niin Kakar chuan Pakistan caretaker PM tana ruat a ni chu lawmawm a tih thu sawiin chutih laiin Opposition leader Riaz chuan, “Province te zawk atangin interim prime minister awm se kan ti a ni,” tiin a sawi.
Kakar hi Riaz-an a rawt a ni bawk a, President Arif Alvi pawhin Article 224(1A) of the Constitution hnuaiah a pawmpui zui bawk. He provision hnuaiah hian president chuan prime minster leh leader of opposition te rawnin caretaker prime minister a ruat thei ang tih a ni a.
Kakar hi kum 2018 khan Senate member ni tura thlan tlin niin politician active tak a ni a, upper house a thlan tlin a nih hma pawhin Balochistan provincial government spokesperson a ni bawk.
Kum 1971 khan Balochistan a Qila Saifullah district a Muslim Bagh area-a piang niin Political science leh sociology-ah Master’s degree a nei a, University of Balochistan chhuak a ni.
Pakistan-ah hian ni 90 chhunga inthlanpui neih hman tura tih a ni a, mahse election commission-in delimitation a buaipui mek avangin leh census thar mila kalpui tur a nih avangin hun a duh deuh mai thei tia sawi a ni a. Chutih chhung chuan Kakar hian cabinet tur te thlangin rorelna a lekkawh lailawk dawn a ni.
Pakistan interim PM-ah Anwarul Hag Kakar
