Pakistan kawpuiah Afghan-ten man leh um chhuah tawk

Pakistan kawpuiah Afghan-ten man leh um chhuah tawk
Afghanistan embassy chuan Pakistan-in an khawpui, Islamabad leh a bul, Rawalpindi-a Afghan raltlan zawng zawngte hnawh chhuah vek tumin hma a lak mek niin a sawi.
Embassy chuan Nilaini khan thuchhuah khawng tak siamin khawpui pahniha Afghan-te hian man leh zawn an hlawh mek a, Police atangin an awmhmun chhuahsana hmun danga insawn tura tihna thupek an dawng niin an tar lang.
Islamabad hian Kabul chu ramri kâna beihna thleng thin thunun thei lova a puh avangin ram hnih inkar hi a chhe mek zel.
“Inhriattir lawkna leh Islamabad-a Embassy of Afghanistan pawh hrilh mumal lova Afghan-te man hi kalpui nawt a ni,” tiin embassy chuan a sawi.
“Hetianga hma an lak mek lai hian Pakistan-a Ministry of Foreign Affairs chuan Islamabad leh Rawalpindi chauh ni lo, an ram chhung hmun danga mi Afghan raltlan awm zawng zawngte pawh thawn haw emaw, chhuahtir emaw a tum tih a sawi zui,” an ti.
Nikum khan Pakistan hian Islamabad leh Rawalpindi-ah dan lova Afghan raltlan an luh a phal loh thu a lo puang tawh a. Islamabad thuneituten khapna an puang hma lawk hian Afghan raltlante hi eptu party, Pakistan Tehreek-e-Insaf (PTI)-in November thlaa an khawpuia sorkar duh lohna an lantirah an tel ve tih thu a thang nghe nghe.
November, 2023 khan Pakistan hian Afghan maktaduai tel, dan ang thlapa an rama awmte pawh thawn kir vek tuma hma lo la tawhin sawisel a hlawh hle.
Pakistan-ah hian Afghan maktaduai 2.5 chuang an awm niin sorkarin a chhinchhiah a. A zahve aia tam hi United Nations High Commissioner for Refugees (UNHCR)-a inziak lut a ni a. A hmain thuneitute chuan an inziah luhin a huam chin chu June, 2025 thleng pawt seiin hemi hun chhung hi chuan man emaw, thawn haw emaw an ni dawn lo tih an sawi.
Thla hmasa khan Prime Minister Shehbaz Sharif-a pisa chuan phek hniha sei lehkha tichhuakin hetah hian sorkarin thawh thuma Afghan-te an rama a hawtir dan tur a chuang.
Afghan embassy chuan hun rei lo te chhunga Afghan raltlante chhuahtir vek tumna chu a ngaimawhawm tih sawiin Pakistan thutlukna chu thil tih dan phung lo tak niin a sawi bawk.
Pakistan hian Islamabad leh Rawalpindi atanga Afghan raltlante thawn kir inbuatsaih nan hian March 31 thleng hun tiamin hemi hun chhunga an ram hmun dangah tal an lo insawn lo a nih chuan an thawn haw dawn a ni.
Kum thum liam ta chhung khan Afghan sang telin Pakistan hi an pan a. Tam tak chu United States-a awm thei tura phalna nei an ni.
Hetih lai hian US President Donald Trump chuan thla hmasa khan refugee programme a titawp a. Hemi hnuah hian Afghan 20,000 chuang chu Pakistan-ah kal lehna tur nei lovin an tangkhang mek.