Paksistan President atan Zardari

Asif Ali Zardari chu Pakistan President 14-na ni turin hneh taka thlan tlin a ni a, Pakistan a president tum hnih ni thei awmchhun a ni bawk.
Zardari hi Pakistan Peoples Party co-chairperson nibawkin ruling alliance PPP leh Pakistan Muslim League-Nawaz (PML-N) te candidate intawm a ni bawk.
A tumpui ber Mahmood Khan Achakzia erawh Pashtoonkhwa Milli Awami Party (PkMAP) ni thungin prime minister hlui lung in tang mek Imran Khan a Pakistan Tehreek-e-Insaf (PTI) te thlawp candidate a ni thung a, Sunni Ittehad Council (SIC) ten an thlawp a ni bawk.
Kum 68 a upa Zardari hian vote 255 a hmu a, a tumpui kum 75 a upa Achakzia chuan vote 119 a hmu thung a ni.
Paksitan president hi electoral college thlan thin niin National Assembly member te bakahy provincial assembly pali member tena an thlan thin a ni.
PPP te chakna Sindh Assembly ah chuan Zardari hian 58 vo0te a hmu a, Balochistan Assembly ah pawh vote awm zawng zawng 47 a hmu vek bawk.
PML-N tena sorkar an siamna Punjab assembly ah chuan Zardari an 43 vote a hmuh laiin Achakzia chuan 18 vote a hmu ve thung.
Khyber Pakhtunkhwa assembly SIC/PTI sorkar naah chuan Achakzia an 41 vote a hmuh laiin Zardari chuan vote 8 chauh a hmu thung.
Electoral college ah seat 1,185 awmin heng zinga 92 chu hnawhkhahloha awm mek a ni a. 1,093 ten vote thlakin vote thi te a awm avanign vote nung 1,035 chauh a awm thung.
Sumdawng atanga politician ainlet Zardari hi Pakistan prime minister thah tak Benazir Bhutto psal a ni a. A nupui prime minister nih laiin eirukna thilah inhnamhnawih nasa puh niin development project hrang hrang thawh turah 10 per cent zel la anga puh niin a hming lemah ‘Mr 10 per cent’ tihiala sawi a ni.
Eiruk thubuai hrang hrangah thiamloh chantir tawh niin lung in pawh a tang hrep tawh bawk a. Tunah erawh a thubuai hrang hrangah thiamchangin a awm tawh thung.
Zardari hian kum nga a president term hmang tawh Dr. Arif Alvi chu a thlak dawn a ni.
Hetihlai hian Imran Khan a PTI party te chuan Pakistan president atana Zardari thlan chu pawm theihloh leh constitution kalh tiin mipui te chu buaina siam lova mahse lungawilohna lantir turin an ngen thung.