Palestinian Pele’ thlavang hauhtu Salah

‘Palestinian Pele’ thlavang hauhtu Salah
Israel sipaite’n Gaza an phindarh boruaka thawm lo chhuah tawh Liverpool forward Mohamed Salah chu tunhnaia Israeli-in Gaza Strip chhim lam a beih tuma nunna chan Palestinian footballer Suleiman al-Obeid thlavang hauhin a tawngchhuak leh a, Uefa-in Suleiman thihna chungchanga ‘aw’ a chhuah dan chu tawk a ti lo tih a auchhuahpui.
Muslim pachal Salah hian social media lamah Israel beihna avanga Palestinian footballer thihna chungchanga Uefa thuchhuah chu famkim lo leh tawk zo lo tiin a dem a, “Engtia thi nge a nih chiah a, khawi hmunah nge, engvanga thi nge a nih tihte han tarlang tel ta che u maw le,” tiin Europe khawmualpui football thununte thuchhuah chu nep tiin a chhanglet!
Karliamta Ningani khan Palestinian Football Association (PFA) thuchhuah chuan puina nghaka a awm laia Israel sipai beihna avanga Obeid thih thu hi puangin, Zirtawpni khan Uefa pawhin X kaltlangin thuchhuah an siamk ve nghal a:
‘Palestinian Pele’ Suleiman al-Obeid kan mangtha a lo ngai ta.
“Hun thim ber karah pawh naupangte tana teh sen rual loh beiseina pe thei khawpa talent nei tha a ni,” tiin thlahna leh ui thu an tichhuak a, hei hi kum 33-a upa Egypt international Salah chuan tawk a ti lo hle a, a chunga tarlan tak ang hian Uefa thuchhuah chu a chhanglet zui ta a ni.
PFA-in ‘Pele of Palestinian football’ an tih ve ngat Suleiman al-Obeid hi a thihin kum 41-a upa a ni a; a career-ah goal 100 chuang thun tlingin, chu’ng zinga goal hnih chu international match 24 a khelh atanga a thun a ni nghe nghe.
Kum 2023 October ni 7-a Hamas firfiak pawlin Israel ram an run chiam tum khan a hmunah mi 1,200 vel thatin, mi 251 manin an hreng zui nghal a; kha mi hnu khan Israel chuan sipai chakna hmangin Gaza a bei ve nghal a, Israeli military operation hrang hrang avanga he thu buatsaih lai thlenga Gaza bika nunna chan tawh zat hi mi 61,300 chuang an ni ni hem mai!
Karliamta Inrinnia Hamas enkawl health ministry tarlan danin, an thuchhuah hma darkar 24 chhunga Israel sipai beihna avanga thi zat chu a tlem berah pawh 38 an tlin thu leh hliam 491 an awm thu an tarlang a, he thihnaah hian Palestinian zinga an footballer lar a lo tel ve a ni.
Gaza hi Israel-in a danpin avangin an tam nasa hle a, khawvelin an nawr rengna karah Israel hian ei leh in tur a phurlut zauh zauh a, ei tur lo thlen hun nghaka awmte chu Israel hian a han bei leh lawk bawk thin niawm a ni a, tuntuma Suleiman al-Obeid thih chhan pawh hi chaw lo thleng tur a nghahna lama thi a nih thu tarlang a ni.
Tun thla tir lama UN report danah pawh kumin May thla nawi lam atanga chhiarin Palestinian 1,373 zet thite chu ei tur an zawn laia thi an ni.
Indona kara chhuanchhamte pui tur hian US leh Israel chuan inthurualin Gaza Humanitarian Foundation (GHF) kaltlangin Gaza-ah hian ei tur an phurlut zauh zauh a, chu’ng chawte chu semchhuahna hmun bik an siam a, chu hmuna ei tur a nghah laiin Palestinian Pele pawhin Israel sipai ngen mu a tawng fuh ve ta niin a lang!
Tarlan tawh angin, Salah hian tunhma pawhin Gaza mipute’n puihna (humanitarian aid) an mamawhzia thu hi a lo tlangaupui tawh thin a, khawvela ram hruaitute chu Israel leh Hamas inkara buaina chhuak avanga ramsa ang leka inthahna thleng reng hi a hmuna hmuhpui turin a lo sawm tawh a ni..