British athlete piangchhuak tawh zinga ropuiberte zinga lang pha Mo Farah chuan a lo sawilawk tawh angin Great North Run 2023 chu a career kharna atan a hmang a, intlansiak a hmachhawn tawpnaah hian hnehna chang zo loin palina a luah.
Kum 40 mi Farah hi vawili ngawt Olympic champion ni tawh a ni a, intlansiak hmingthang Great North Run hi a hun tawp hmanna’n a thlang ta a ni.
Great North Run an tih hi Newcastle leh South Shields inkara tlan mi niin, mel 13.1-a thui a ni a; Mo Farah hian minute thum leh second 30-in pakhatna Ethiopia mi Tamirat Tola a pha lo a, Tola hian minute 59 leh second 58 chhungin tlankawng a zawh zo hman.
Farah hian London Olympic 2012-ah khan 5,000m leh 10,000m-ah gold medal awrhin, Briton zinga chutiang ti thei hmasaber niin, Rio 2016-ah a title pahnih a humhim leh ngat a ni.
British infiammite zingah Farah aia Olympic medal la tam hi panga chiah awmin, Olympic medal bakah Farah hian world title paruk, European title panga leh European indoor title pahnih bakah kum 20 chuang chhung khan Chicago Marathon hnehna a chang bawk.
Palina ni chunga chawl Mo Farah
