Paragliding Accuracy Championship nei zo
Serchhipa International Paragliding Accuracy Championship leh Air Sports Festival 2024 neih chu Inrinni khan neih zawh a ni a. Mipa-ah Nepal atanga rawn kal Aman Thapa chu pakhatna niin, hmeichhia ah Korea atanga rawn kal Eun Young Cho pakhatna a ni.
Serchhip Zawlpuia a kharna inkhawm hmanpuitu chief minister Lalduhoma chuan ram dangte nena inpawhna leh inthianthatna siamna kawngah he thil hi a pawimawh tih a sawi a. Mizoram chu adventure tourism hmunpui a nih theih dan sawiin, Serchhip chu India rama adventure sports atana hmun tha ber pawl a nih avangin adventure tourism hmasawnna atana hmun pawimawh tak a ni tih a sawi.
Tourism minister Lalrinpuii chuan he championship hlawhtlinna tura thawktu zawng zawng chungah lawmthu a sawi a. Adventure tourism-a tui tak leh hmang hria chief minister kan nei, tia sawiin, a ni zarah a bial chhung ngeiah khawvel huap inelna Mizoramin an thleng thei tih a sawi. Ram dang atanga lokalte chungah lawmthu sawiin, championship chu anmahni vanga hlawhtling a ni a, an rama an haw leh hunah pawh Mizoram hrereng turin a chah.
International Paragliding Accuracy Championship-ah hian ram paruk – India, Korea, Kazakhstan, Spain, Indonesia, leh Nepal atangin infiammi 30 an tel a. Men’s category-ah 1-na Aman Thapa (Nepal), 2-na Yuda Mesa Putra (Indonesia), 3-na Akshay Kumar (India). Women’s category-ah 1-na Eun Young Cho (Korea), 2-na Disha Fajar Praharini (Indonesia), 3-na Alisha Alisha (India) niin, team category-ah Indo David Team, Indonesia leh Spain inkawp chu champion an ni.
India ram mi bik intihsiak mipaah 1-na Akhsay Kumar, 2-na Ram Vilas Verma, 3-na Shinde Ram. Hmeichhia-ah 1-na Alisha Alisha, 2-na Sophia Biakdingpuii an ni. Category tina pakhatna in Rs. 200000, pahnihna Rs 150000 leh pathumna in Rs. 100000 an dawng a ni.
He Championship hi Fédération Aéronautique Internationale, Aero Club of India leh Mizoram Aero Sports Association hruaituten an telpui bawk.
Paragliding Accuracy Championship nei zo
