ndia hockey goalkeeper PR Sreejesh chuan tunkar Thawhtanni khan hockey khelh a chawlhsan hun tur puangin, Paris Olympic Games zawh rual hian kum 18 chhung zet national team tana career hlawhtling tak a lo kalpui tawh chu tawpsan ve tawh a tum thu a sawi.
Kum 36 mi veteran hian international match 328 khel tling tawhin, chu’ng zingah chuan Olympic Games vawithum bakah Commonwealth Games leh World Cup vawi duai lo a tel a, July ni 26 atanga tan tur Paris Games 2024 hi Olympic hockey tournament-a a vawili inlanna tur a ni tawh.
Hockey India chuan press release siamin Sreejesh-a thusawi an tarchhuak a, tah chuan heti hian a chawlh hun tur a puang:
“Ram tana ka inlan tawpna tur Paris Games hmachhawn tura ka inbuatsaih lai hian ka hun kal tawhte ka thlirkir a, chhuan tur tamtak ka hmu ve a, chutih rualin hmabak ka la neihah hian beiseina ka la nei bawk.
“He zinkawngah hian min thlawp tlatna avangin ka chhungte bakah ka team-mates, coaches, fans leh Hockey India chungah ka lawm a, ka laka rinna in nghah avangin ka lawm takzet a ni,” tiin.
A career-a a hlawhtlinna lian ber chu 2020 Tokyo Olympics-a bronze medal a awrh kha a ni mai thei a; 2014 Asian Games-ah India tan gold medal awrhin, 2018 Asiad-ah khan ram tan bronze medal a hlawhchhuak leh bawk.
2018 Asian Champions Trophy champion team-ah telin, Bhubaneswar-ah khan a thlengtu India chu 2019 FIH Men’s Series Finals champion team a nihpui bawk.
2022 Commonwealth Games-ah pawh India tan silver medal sualchhuakin, Sreejesh hi India mipa hockey team-a player langsarber pawl a ni rei tawh hle a ni.
Indian hockey team hi Games hmachhawn turin Switzerland ramah an inkulh phawt a, he hmuna training an zawh hnuin Paris an thlawklut tawh a, July ni 27 khian Olympic campaign an tanna inkhelah New Zealand tumin, Argentina (July 29), Ireland (July 30), Belgium (August 1) leh Australia (August 2) an su zui leh ang.
Paris Olympic zawha chawl tur hockey icon Sreejesh
