Parliament chu Rahul Gandhi thusawi leh Adani issue chungchang vaangin rorel hlei thei lova siamin a awm zui leh a. A tirah House pahnnih te chuan Martyrs’ Day (Shaheed Diwas), Indian revolutionaries Bhagat Singh, Rajguru leh Sukhdev British tena an khihlum hriatrengna hun an hmang a.
Nimin khan Lok Sabha chuan Union budget kaihhnawih sawihona leh vote lakna nei tur an ni a, chung zingah chuan supplementary demands for grants pawh a tel a. Rajya Sabha chuan ministry hrang hrang Textiles leh Railways chungchang te sawiho tum an ni bawk.
A hma niin House thutkhawm chu India ram hmun hrang hranga ugai, Gudi Padva leh festival hrang hrang te avangin neih a ni lo va. March 21 khan Lok Sabha chuan Budget Session thawh hnihnaa legislative business a la tan thung a, Jammu and Kashmir Appropriation Bill 2023 leh Appropriation Bill (no.2) 2023 chu a pawm fel a. Rajya Sabha erawhin legislative kaihhnawih engmah a khawih hman lo thung.
Parliament budget session hi a tir phat atangin hasatna leh buaina in a chim nghal a, House pahnihah inauelna leh lungawilohna lantirna avangin tihtawpin a awm deuh reng a. Opposition te chuan Adani Group issue ah Joint Parliamentary Committee probe an ngiat laiin Treasury bench lam chuan Rahul Gandhi chu ram pawn lama Indian democracy a sawi danah ngaihdam a dil an phut bur thung.
Budget session hi March 13 khan budget document te zirchian hnuah tan leh a ni a, tuna thawh hnihna hi ruahman ang chuan April 6, 2023 a khar tur a ni.
Rajysa Sabhaah chuan zing lama session tana nih hnuah paper, report leh statement te pharh a ni a, Jammu and Kashmir Appropriation Bill a hma ni a Lok Sabha a pawm fel tawh pawh pharh a ni bawk a. Mahse, Opposition member te chuan short-seller Hindenburg tena Adani Group te puhna sawiho leh Congress leader Rahul Gandhi chu a insawifiahna hun pek an phut bur nghal a. Inremna a awm theihloh hnuah chawhnu dar 2 ah House tan leh tura tihtawp lailawka ni a.
Chair chuan rule 267 hnuaiah notice 12 a dawn thu sawiin chung te chu Adani issue sawihona kaihhnawih vek a ni tiin avaia hnawl a nih thu a sawi zui a.
Rajya Sabha Chairman Jagdeep Dhankhar chuan floor leader te nen tum thum meeting an neih thu leh an dinna sawhsawn an tum loh vek thu sawiin inremna neih a ngai a ti a. Leader of the House Piyush Goyal chuan Rahul Gandhi chuan ngaihdam a dil ngei tur a ni tiin Opposition te chuan Adani issue sawiin inbumna a thleng em tiin zawhn an nei ve thung a. Buai nuai nuai karah dar 2 a session tan leh hnu lawkah House chu a tuk atan tihtawpin a awm zui a ni.
Lok Sabha lamah pawh opposition te chuan Adani group chungchang sawihona leh joint parliamentary probe neih an ngiat zui a. Inauel nuai nuaina hnuaiah house chu zan dar 6 a thutkhawm leh turin tih a ni zui bawk.
Parliament rorel hleithei lovin awm zui zel
