Kum 5 kalta chhung khan MNF sawrkar chuan party induhsakna tel loin sawrkar hna sang 5 chuang an tifel hman tih MNF Thalai vice president Zodinpuia chuan a sawi.
MNF Thalai vice president chuan 2018 December 15-a MNF kaihhruai sawrkar lakluh a nih atangin Mizoram sawrkar hnuaia sawrkar hna latu pathum – Mizoram Public Service Commission, Mizoram Subordinate Service Selection Board leh Departmental Promotion Committee hnalak dan chu sawiselna thawm an hriat loh thu sawiin, sawrkar kal mekah MSSSB-in direct recruitment-in mi 243, limited departmental exam-ah mi 288, departmental exam-ah 216, promotion-in 2906, regularisation 122, confirmation 1366, conversion 47 leh absorbtion 43, a vaiin mi 5231 an tifel hman a. MPSC pawhin tun sawrkarah post hrang hrang 81 atan hna thar lak chu hlawhtling takin an zo fel tih a sawi.
“Heng hnalakah hian ruling party induhsakna awm loin, a tling leh tlakte lak an ni thin a; kum 5 kalta chhunga MNF sawrkar hnuaia hnalakah sawisel tur a awm loa, chu chuan MNF sawrkar chu sawrkar langtlang leh thianghlim, zirlai leh thalaite tana inghahna tlak a nih zia a tilang,” a ti.
Mizo thalaite hmasawnna chu MNF ngaihpawimawh a nih avangin, thalaite ngaihtuah bik turin 2008 April khan Mizoram Youth Commission an din a, MYC kaltlang hian Mizo thalai sang tam takin rampawn thlengin hna an hmu tawh a, thalai hna zawng tana innghahna, ‘inpui’ ber a ni tawh tih Zodinpuia hian a sawi. Mizo thalai central service leh all India service-a an luh tam theihnan MNF sawrkar chuan theihtawp chhuahin, IAS coaching pe in an senso zawng zawng a tumsak a, sawrkar hmalakna avangin Mizoramin hun rei tak a tawn tawh loh UPSC Main exam paltlang an awm leh ta tih a sawi bawk.
Party induhsakna awm loin hna sang 5 chuang tifel hman – MNYF
