Party inkhawmah nungcha leh ramngaw humhalh lam sawipui
Lunglei District Congress Committee chuan Thawhtannia Congress Bhavan-a inkhawmah environmental activist C Luri chu sawmin, ramngaw leh nungcha humhalh lam a sawipui.
Environmental awareness hun an hman hmanpuitu C Luri chuan, missionary kan tirchhuak chu a lawmawm em em rualin, thing leh mau leh ramsa chunga kan nunrawn thin avangin chanchin tha hril kawngah hnamdangin kan missionary-te thusawi awih harsa an ti tih a sawi a. Ramsa leh thing leh mau humhalh chu midang kutah dah loin, mahni kutah a awm tih kan hriat a hun ta hle tih a sawi.
Nungcha leh thing leh mau kan hmangaih a nih chuan anmahni humhalh ringawt a tawk loa, an chenna hmun humhalh a tul tih sawiin, “Mihring pawhin chenna, ei leh in kan mamawh avangin Congress party chuan rangva in sem tawh a, NLUP pawh in sem tawh. Hrehawm leh na hre ve thei kan ran vulh, nungcha leh thing leh mau hi kan mamawhna awm bawk mah se, kan nawm kan maka tichereua suasam tur kan ni loa, danin a humhalh vek a ni,” a ti.
Nungcha chunga nunrawng chu mihringpuite lakah pawh an nun a rawng duh deuh tlangpui tih chu crime lam zirbingtute hmuh dan a ni tih C Luri hian sawiin, nungcha, thing leh mau humhalh a tul zia hi political party hrang hrang office-a sawina hun awm se tih chu a duhthusam a ni tih a sawi a ni.
Party inkhawmah nungcha leh ramngaw humhalh lam sawipui
