Mipui thlantlin ram leh khawtlang hruaitu neih tam dan atanga tehin BJP chu Mizoramah party lian pathumna an ni tawh tih an party thupuangtu K Laldinthara chuan a sawi.
BJP Mizoram thupuangtu sawi danin, state assembly-ah member pahnih an neih bakah Autonomous District Council-ah member 18 neiin, village council 69 an la a, heng bakah hian Vc an lak lohnaah VC member dang 21 an la nei bawk tih sawiin, mipuiin an thlantlin zat atanga tehin, Congress party kalpelin party lian pathumnaah an inhlangkai tawh tih a sawi.
Mizoramin ZPM hruai sawrkar thar kan nei ta leh chief minister thar pu Lalduhoma bakah minister te, MLA te BJP Mizoram chuan a lawmpuiin an lakah beiseina sang tak a nei tih K Laldinthara hian a sawi a. Zoram mipui beisei ang ngeia hmasawnna kawnga min kaihhruai an beisei a, chutianga hmalakna awmah chuan BJP Mizoram chuan theihtawp chhuahpui a inhuam reng a. Central scheme leh programme hrang hrang a nihna tur ang taka mipuiin an chhawr theiha hma la turin an beisei tih a sawi bawk.
Congress party chu hlemhletna lamah a la hmingchhe zel tih BJP Mizoram thupuangtu hian a sawi a. Rahul Gandhi nena inhne hnai tak, Congress MP Dheeraj Sahu chu tunhnaiah Income Tax department-in sum chheprelh cheng vaibelchhe 200 chuang nen an man a, hei aia tam sum chiang lo hi a hnen atanga man tur ala awm rin a nih thu leh, amah bak Congress MP leh hruaitu dang hetiang chheprelh ching hi an la awm teuh an ring tih a sawi a. Gandhi chhungkua leh Congress party, an sawngawi zawnpui ‘INDI Alliance’ a tel political party zingah hetiang hi an la tam hle tih a sawi a. Mizoram mipuiin chu chu kan lo hriat ve a tul tih a sawi a ni.
Party lian 3-na kan ni tawh – BJP thupuangtu
