Party zingah hotu kan nei tha lawrlak
– MPYCC president
Tuna Mizorama political party zingah a mal te te a buk tawna buk rit ber leh keu neuh neuh pawha belchian dawl ber tur hotu rual nei tha ber an ni tih Congress Thalai hruaitu Ngurdingpuia Pachuau chuan a sawi.
Thawhtannia Congress Bhavan-a inkhawmah Congress Thalai president Ngurdingpuia Pachuau chuan, mipuiin thil kan hre rei thei loa, kan chhinchhiah reng peih loa, ZPM kan thlantlin chhan leh mipui hmaa an intiamna zozai kha sawi dawn ila, point 10 sawi chhuak thei pawh kan awm lo maithei tih a sawi a. Kum 2023 inthlan hmaa mipui an tiam leh a hnu lama mipui hmaa an sawi kha an tihlawhtling reng em, tih chhut turin mipui a ngen tih sawi.
ZPM-in chief minister leh president nih kawp thiang lo, tia au dum dum, nih kawp tha ti leh si, mahni leh mahni in debate thiam, dawt pawh ‘confi’ taka sawi thiam an nei tih a sawi a. MNF lah an pu berin mumang a ngah thin, tiin, Congress party erawh an hotute chu tawngkam thiam hluah ni si lo, ti deuh churh, rinawm tlut, belhchian dawl ru fu si an ni thung tih a sawi bawk.
Thutiama dingnghet thinten rin an hlawh thin a. Thutiama dingnghet tlat thin, dawt leh tihhlawhtlin hleih loh tur leh mumang leh suangtuahna sawi ve ngai lo Congress party chu Zoram mipuiin ring ngam turin a ngen tih Congress Thalai president hian sawiin, “Tuna Mizorama political party zinga hotu nei tha lawrlak kan ni a, a mal te tea buk tawn pawha buk rit ber leh keu neuh neuh pawha belchian dawl ber tur hotu rual nei tha ber kan ni. Kan ram leh hnam mamawh hria, mitin, chhungtin dinhmun chawisang tura innghahna tlak leh a ngaihna hria, thutiama rinawm, tih dan phunga lo nei thin Congress party hi Zoram mipui mamawh chhanna dik tak a ni,” a ti.
An party hotuten thalaite pawimawhna hriain, thalaite hmasawnna atan ‘Mizoram Youth Manifesto 2028’ siam a ni dawn tih a sawi a. Mizoram thalaite manifesto atan mahni duhzawng rawt theihna ‘Huapzo Forum’ siam an tum lehzel chuan, thalaite tan duhzawng leh tha tih zawng, idea thawh ve theihna chance siam nachang hria hruaitu an nei tih a sawi a ni.
Party zingah hotu kan nei tha lawrlak – MPYCC president
