Higher Secondary School Leaving Certificate Examination 2026 result-ah kum hmasa aia pass percentage a that avang leh sawrkar sikul-in stream tinah pass percentage zaa 80 an pelh vek avangin an lawm hle tih School Education minister Dr Vanlalthlana chuan a sawi.
School Education minister hian thuchah siamin, Mizoram Board of School Education buatsaih HSSLC Examination 2026 result chhuakah zirlai exam 12243 atanga za zela 87.67 in hlawhtlinna an chang leh kum hmasa aia pass percentage zaa 6.57 a a sang chu lawmawm a tih thu a sawi.
Kumin result chhuakah sawrkar higher secondary school zirlai pass zat chu stream hrang hrangah zaa 80 chung lam an ni vek tih sawiin, kum hmasa lam result-ah zirlai pass percentage zaa 80 an la pel ngai loa, kuminah erawh stream tinah an pel vek tih a sawi. Sawrkar sikula zirtirtute leh zirlaite taimakna lang chu lawmawm a tih thu leh a chhuan thu sawiin, candidate zawng zawng pass vekna sikul neitu zirtirtute leh zirlaite pawh a lawmpui tih a sawi bawk.
Zirlai hlawhtlinna chang tharte a lawmpui a, zirna sang zawk an zir chhohnaah hlawhtlinna an chan zel theihnan duhsakna sang ber a hlan tih a sawi a. Hlawhtling rih lote chu beidawng loa nasa zawka tan la a, hlawhtlinna sual chhuak turin anmahniah theihna a awm tih hrereng turin a chah.
“A hun taka result tih chhuah a nih theihnana thawktu MBSE officer leh staff-te, HSS zirtirtute, zirlaite leh nu leh pa, khawtlang hruaitute leh zirna kaihhnawiha thawktu zawng zawng chungah lawmthu ka sawi a. Mizoram zirna-in hma a sawn zel theihnana theihtawp chhuah zel turin ka sawm a ni,” a ti.
HSSLC pass-te chu zirna kawngpui pengthuam atanga kal darh a lo ngai dawn ta tih Dr Vanthlana hian sawiin, mi rilru puitling chu he hunah hian an danglamna a lo lang thin a. Kawng zawh tur thlan kawngah leh damchhunga hnathawh tur thlan kawngah hun pawimawh a ni tih a sawi. Mahni kawng zawh tur theuhah hlawhtlinna paw chhuak theia tan lak a ngai hle dawn tih a sawi a ni.
“Kan ramah zirna tha a awm theihnan sawrkar leh mipui lungrual taka tanho a ngai a. Kutbeng rimawi siam turin kut pahnih a chet a ngai ang hian, zirna kawnga hlawhtling turin sawrkar leh mipui kan tanrual a ngai,” Education minister hian a ti a. Nu leh pate chu an fate zirna ngaihsak deuh deuh tur leh Mizoram tana mi chhenfakawm chher chhuah tuma theihtawp chhuah turin a sawm tih a sawi a ni.
Pass percentage sang leh sawrkar sikul an chet that vangin ka lawm – Education minister
