Pathian ram niloin ZPM
ram tundin an tum mek
– Lal Thanzara
Ram rorelnaah Pathian ram tundin tumtuten Pathian ram niloin ZPM ram tundin an tum avangin mipuiin an aiawha khawtlang enkawl tura an thlan party dangte chu an enhrang lui tlat tih Congress hruaitu Lal Thanzara chuan a sawi.
Zirtawpnia Congress Bhawan-a inkhawmah MPCC president Lal Thanzara chuan, sawrkarin village council term a hun hmaa tihtawp a nih chhan chu VC-ah political party dang an la tam avangin thawhpui a har tih chhuanlam a ni, tih The Aizawl Post chanchinbu ah tarlan a nih tih a sawi.
“Ram rorelnaah Pathian ram tundin tumtute hian Pathian ram ni loin ZPM ram tundin an tum avangin mipuiin an aiawha an thlan khawtlang enkawltu party dang an enhrang tlat a; Sinlung Hills Council enkawl tura mipuiin an thlantlinte pawh ZPM-in sawrkarna an siam loh avangin an thiat leh duh mai ang tih a hlauhawm hle,” a ti.
Power project lian chu duh duha siam leh din mai theih a ni loa, a kalkawng harsat zia leh tihfel ngai tam tak awm chu tuna Power minister hian a hre lo nge, statement mak tak a tichhuak tih Lal Thanzara hian a sawi. Tuirial Hydel Project chu Pu Lal Thanhawla hunlaia hma lak a ni, tiin, sawrkar inthlakah compensation uchuak tak avangin harsatna a awm a, Congress sawrkar leh hnuah MNF-in a suasam buai vek a, harsatna leh buaina paltlangin Congress party-in Mizoram tan ram rotlingin a din chhuak ta chauh tih a sawi.
“Mipuiin Congress party sawrkarna pe lo se, Tuirial hydel project hi puitlin a ni loang,” a ti.
ZPM party chhungah buaina leh harsatna a thleng niin MPCC president hian a sawi a. An party hotuten an minister-te an beisei an pha lo lutuk leh mahni te tea ro hran an neih theuh avangin an buai a, Congress atanga beihpui turin an rawn ngen hial tih a sawi a ni.
Pathian ram niloin ZPM ram tundin an tum mek – Lal Thanzara
