Pathianni serh lehzual tura hma lak tum
Mizoram Presbyterian Kohhran hnuaia Kristian Thalai Pawl chuan thalaiten Pathianni an serh lehzual theihna atan hma lak a rel a. Ruihhlo do kawngah nasa zawka tan lak a rel bawk.
KTP General Conference vawi 61-na, Saitual-a neih chu a tiak ta a. An thurel zingah thalaiten Pathianni kan serh lehzual theihnan Central KTP-in hma la rawh se, tih chu pawm a ni a. CKTP-in ruihhlo do kawngah a hma aia nasa zawkin hma la se, tih pawh pawm a ni.
KTP member zingah kohhran dan thianghlim, biak in hawnga nupui pasal nei an tam theihnan Central KTP-in hma la rawh se, tih te; Synod Charity Fund atan tum khat inkhawm thawhlawm lakkhawm, Youth Recreation Centre puala tum khat inkhawm thawhlawm lakkhawm, Street Ministy neih chhunzawm zel, general conference thlengtu puihna Bial tina special budget siam rawtna pawm a ni bawk.
KTP inkhawmpui vawi 61-na hi February 26 zan atanga tan a ni a, March 1 zan thleng a awh. Conference thupuiah “Pathian tana mi hlang” (Sam 119:1-3) hman a ni a, speaker chu Rev PC Lalropuia a ni. Pathianni chawhma leh chawhnu inkhawmah speaker hnen atangin Pathian thuchah ngaihthlak a ni a, zanah Central KTP leader kal chhuak Rev. H Lalawmpuia’n Pathian thuchah a sawi a, kum 2026 – 2028 chhunga CKTP hruaitu thar hlan a ni.
Kum 2030 KTP general conference chu Zawlnuam leh Bawrai Pastor bialin an inthlen tawm dawn a, a hun atan 2030 February 28 leh March 3 chhung a ni ang.
Saituala KTP General Conference hmanah hian reception duty chhinchhiah hnuhnung ber Pathianni chawhma thleng khan palai 47,039 an in report a. Chawhma inkhawmah khan mi 59000 vel inkhawma ngaih a ni.
Pathianni serh lehzual tura hma lak tum
