Phai lam atanga rel hmanga buhfai lo lut chu Bairabi North YMA ten, Pathianni bikah hlan thlak an phal loh avangin harsatna hrang hrang an tawk tih FCI Divisional Manager-in tunhnai khan a sawi a. Buhfai hlan thlak theih a nih loh avang hian relin a nghak thin a, nghah man cheng nuai 13 chuang te chawi belh a ngai thin niin FCI divisional manager hian a sawi bawk a ni.
Mizoram hi Kristian tamna state a ni a, Denomination hrang hrang kan awm a, kar khat chhungin Pathian biakna ni bik kan neih dan pawh a inang lo. Inrinni-a inkhawm thin an awm laiin, Inrinnia inkhawm ve lo chuan hna an thawk mawlh mawlh a. Sunday-a inkhawm thin an awm laiin Sunday-a inkhawm ve lo chuan hna an lo thawk leh mawlh mawlh bawk a; tu mah kan insawisel lo a, insawisel theih pawh a ni hek lo.
Bairabi khua hi khaw pawimawh tak a ni a, Mizoram pum tana pawimawhna lian tak nei a ni. Kan rin pui ber buhfai a lo thleng ta cheng a, hlanthlak theih loh tura pawl pakhatin a lo khap bet ringawt a nih chuan thil kalhmang tur niin a lang lo. Aizawl khawpuiah hian Pathianni-ah city bus leh taxi-te hi service phal a ni lo tiin YMA hian thuneihna lek kawh tum ta se, chutiang deuh chu Bairabi-a thil thleng mek dinhmun hi a ni thei awm e.
A thuhrimin, khawtlang inrelbawlna thil hi chu sawrkar thuneihna a ni a, pawl hi chuan pawl member chungah thuneihna a lek kawh thei ang a, member pawn lam, khawtlang kaihhnawih inrelbawlna thilah chuan thuneihna kenkawh a tum tur niin a lang lo. Pawl member chunga thuneihna lekkawh chungchangah pawh, Pathiannia hnathawh leh hnathawh loh chu sakhaw thil a nih avangin mimalin zalenna zau tak a nei a, pawl thuneihna leklamna tur pawh niin a lang chuang lo.
YMA hi pawl zahawm tak, Mizote tan chuan hnam thuikhawmtu pawl pawimawh em em a ni. Vantlang, khua, ram leh hnam tana a hlutna hi a sang em em; chutih laiin khawtlang leh ram leh hnam harsatna thlen thei zawnga hmalakna leh mawhphurhna inpek tam lutuk a awm thei ang em tih enfiah ve fo a tul awm e.
Pathiannia buhfai unload theih loh hi….
