Pawl 12 science leh maths
zirlaibu Mizo tawngin siam
Mizoram Board of School Education building thar chu Ningani khan hawn a ni a. A hmanpuitu School Education minister Dr Vanlalthlana chuan pawl 12 zirlaibu – Physics, Chemistry, Biology leh Mathematics Mizo tawnga buatsaih a tlangzarh nghal.
Minister chuan MBSE building thar luah theiha sak zawh a ni chu lawmawm a tih thu a sawi a. New Education Policy 2020-in a beisei anga zirlaibu engemawzat Mizo tawnga buatsaih a nih tawh bakah tunah pawl 12 science leh mathematics zirlaibu tur Mizo tawnga peihfel a ni leh ta chuan zirna-in hmasawnna a hmuh phah ngei a beisei tih a sawi.
Sap tawng leh tawng dang thiam a pawimawh rualin, mahni pianpui tawng hlamchhiah phahnana hman erawh hnam anga boralna thlentu a ni thei tih sawiin, “Mizo tawng ngeia zirlaibu buatsaih hian zirna kawnga hmasawnna thlentu a nih ka beisei bakah hnam humhalhna kawnga hmanraw pawimawh tak a nih ka beisei,” a ti.
School Education special secretary David Lalthantluanga sawi danin, Mizorama school-te chu NEP 2020 in a phut angin State School Standard Assessment hmanga endik thin a ni dawn a. Ram pum huap zirnaa inelna hrang hrang, National Eligibility cum Entrance Test leh Joint Entrance Examination-a Mizo zirlaite dinhmun enin, zirna kalpui dan thlirlet a, tan lak ngaihna lai zirchian a, hmasawn tura inbuatsaih zel a pawimawh tih a sawi.
MBSE building thar hi NEDP Scheme hnuaia cheng nuai 1000 hmanga sak a ni a. 2021 February 18 khan a sak hna hi tanin, 2024 December 14 a zawh a nia. Building hi chhawng 7-a sang a ni.
MBSE hmalaknain pawl 10 mathematics leh science text book chu Mizo tawngin 2022 November 30-ah chhuah a ni a. 2023 February 6-ah pawl 9 maths & science tihchhuah a ni. Pawl 9 leh 10 zirlaibu hi MBSE-in copyright a neih textbook an nih avangin translation type-a buatsaih a ni a. Pawl 11 leh 12 erawh copyright a awm theih loh avangin translation ni loin, textbook writer-ten reference material nen tangkawpa anmahni irawm chhuaka buatsaih a ni.
Pawl 11 Physics, Chemistry, Biology leh Mathematics textbook hi 2024 June 28 khan tlangzarh a ni.
Pawl 12 science leh mathszirlaibu Mizo tawngin siam
