Pawngsual vangin kum 10 tang turin Tehelka editor hlui Tejpal hrem

Indian court chuan Tehelka magazine editor hlui, Tarun Tejpal-a chu a thawhpui hlui a pawngsual avangin kum 10 chhung lung in tang turin a hrem a, kum tam tak thubuaiah a neihah hian kum 2021 khan thiam chantir a lo ni tawh nghe nghe.
Bombay High Court-a Goa bench chuan Tejpal-a hi India dan section hrang hrang, pawngsual leh mipat hmeichhiatna lama tihduhdahna chungchangah thiam loh a chantir.
Lung in hi a zawm zata tang tura tih a nih bakah court chuan Rs. nuai 10 chawi turin a ti bawk.
Tejpal-a hian an puhna hi a dik loh thu sawiin hremna an puan hma hian Supreme Court-ah ngaihtuah tha turin a thlen dawn tih a lo sawi tawh.
India-a editor lar ber pawl. Tejpal-a laka puhna hi kum 2013 khan ram pum huap hriat a la ni tawh a. Hemi hma kum mai hian Delhi-a hmeichhe pakhat pawngsual rawn leh thah thleng avangin mi sang tel lungawi lohna a thlen hnu lawkah a ni.
Tejpal-a puhtu hian November, 2013-a Goa-a Tehelka-i’n international conference an huaihawtah lift-ah a pawngsual tih a sawi a, he event-ah hian Hollywood star Robert De Niro pawh a tel.
Tejpal-a hian an puhnaah hian BJP-in politic thila amah an beihna niin a sawi.
Kum 2000-a Tejpal-a pawh tela dinpui magazine, Tehelka hi thil chi hrang hrang tichhuak thin a ni a, a tam zawk chu thil bitum bik neia um zuia chanchin thar siam a ni.
An thu ziah zingah Operation West End-ah chuan chanchinbu mi thenkhat chu ralthuam zuar anga inlan te, sipai hotu lian, sorkar hnathawk lian leh chutih laia rorel lai, BJP president pawhin inremna lem siam tuma thamna a lak thu a ruka thla leh video an lakte pawh telin ram chhung leh ram pawnah sawi a hlawh hle thin.
Tejpal-a hi kum 2013 khan man niin thla sarih lung in a tan hnuah Supreme Court-in bail-in a chhuah.
Kum 2021 khan Goa-a sessions court chuan an puhnaah hian thiam a chantir a; mahse, judge-in phek 527-a chhah thutlukna a puannaah hian a puhtu zawhna zawh dan vel chuan sawi a hlawh hle.
Goa sorkarin high court-ah Tejpal-a thiam chantirna hi an khing leh a. Sorkar aiawhin Solicitor General Tushar Mehta dingin hremna na thei ang ber pe turin court chu a ngen.