PC-in raltlan khuahkhirh an duh

PC party chuan Mizorama raltlan awm mekte chu khungkhawma khuahkhirh an duh tih an sawi.
Ningania an office-a PC Assembly an neihah party president Vanlalruata chuan, tanpui mamawh avanga Mizoram beltute humhim leh enkawl chu Mizo nunphung a ni a. Raltlante tha taka enkawl turin Pathianin min duh, tiin, Mizorama raltlan lo lut chu eng mi pawh nise, an mamawh mila humhim leh enkawl tur tih chu an party ngaih dan a ni tih a sawi.
Chutihlai rualin state mipui ration buhfai tawm ngawt loa, kan chanai chanpuiin min chhuh sak tur a ni lo tih chu an ngaihdan a ni tel bawk tih sawiin, “Raltlante hi refugee camp siama khungkhawm vek a, awmze neia enkawl a tul kan ti. Tunhnaia raltlan an rawn pun hma leh pun tirh atanga hei hi kan lo aupui tawh a ni a. Thuneituten ngaihtuah chiang duh loin zalen takin kan awmtir a, a pawi zia kan hre tam tial tial,” Vanlalruata hian a ti.
Buaina leh harsatna lian zawk a thlen hmaa raltlante hi khungkhawm a, awmze neia enkawl a ngai tih a sawi a ni.