Dan loa family pension la mi 674 te thla khat pawisa lak tlingkhawm chu cheng vaibelchhe 12.56, kum khatah cheng vaibelchhe 15.07 vel a nih thu Accounts & Treasuries hotute chuan an tarlang a. He hmalakna hi awm lo ta se, hetiang zat sum hi dik lo takin kum tin a luang ral ang a, kum sawm danah a pung chho zel mai dawn tihna a ni. Kum tam tak chhunga sum dik lo taka luang ral thin tihtawp a han ni tur hi, hma latu sawrkar a fakawm viau a ni.
Tun dinhmunah mi 674 an ni a, nakinah hei ai pawh hian an la tamin a rinawm. Heng mite hian an thil tih dik loh hriain inthlahrung tak chungin an rawn surrender a ni. Sawrkar pawhin lawmthu a hrilh a, a ngaidam a. Thil dik lo a awm tih sawrkarin a hriat hian, dan angin hma a la nghal buan buan bik lova, zaidawh takin, chance a pe a, chumi hnuah grace period te pawh a siam zui leh a. |henkhat chu, dan kalh a ni tih hre reng chunga pension la an ni ang a, thenkhat chu a dik lo tih pawh hre lova ngaihtha taka pension chu la ve mawp mawp mai an ni ang. Mahse, sawrkar chuan huang khatah khung vekin hun thawl tak a siamsak a, hei hi thil tha tak a ni awm e.
Kan thupui Pension Expenditure tihin a kawh hi, dik lo taka pension lakna senso tihna a ni. Eng vanga VIP expenditure nen chuan khaikhin nge a nih kan tih chuan, hetiang hian sawifiah dawn ta ila. VIP chu VIP an ni a, sawrkar danah VIP senso tur hi chu ruahman a ni ngei ang. Mahse, tuna VIP kan tih hi chu, chief minister a ni emaw, minister te an ni emaw, eng eng Chairman emaw, MLA, Officer level sang chinte pawh an ni ang, eng emaw programme, lungphum, Hall hawn, artificial grass hawn, construction visit, Lo zawh runpui etc etc… hmang tura lirthei tam tak tak inzui duah duah ang hi kan kawh ber tur chu a ni. (‘Kan ti ve lovang’ an tih avang hian mipui thikthu pawh a chhe deuh bik a nia!)
Hetia layman te pawhin kan han hmuh phak maia VIP inzui duah duah ho vawikhat Trip atana expenditure hi, a tlem thei ang bera chhut pawhin, CM leh a minister, MLA etc. te kum khat chhunga expenditure (POL etc.) belhkhawm hi cheng vbch 6-10 vel anga chhut theih a ni. Hetah hian food & lodging, vehicle maintenance, TA/DA etc. a la tel lo a. VIP tana ruai lo buatsaih thin nen phei chuan a thahnem tham viau ang. Heng expenditure zawng zawng hi mipui sum atanga pek chhuah vek a ni.
VIP senso hi chu ni tin mipui mit hmuha ral a ni a, langtlang taka senso a ni a, langtlang a nih avang hian a ropui phah lova, langtlang taka awmze nei lova mipui sum senralna a ni; pension lak dan dik lo ang bawka pawi a ni.
Pension dik lo an surrender ngam a nih chuan, ram hruaitute pawh hian an VIP expenditure hi surrender ve se, tih hi mipui ngaihdan a nih a rinawm.
Pension expenditure Vs VIP expenditure
