Mizoram Universal Health Care Scheme (MUHCS) chungchangah Mizoram Civil Pensioners Association (MCPA) te’n sorkar an ngaichang a, an kal zel dan tur pawh a tul anga ngaihtuah an tum.MCPA te hian MUHCS 2.0 hi an tana tha tawk lovah an ngai a, siamthat an dil a ni. Chief minister hnenah lehkha an thehlut a, health minister hnenah a copy an pe bawk. Sorkar lam atanga chhanna an la hmu lo a, an ngaihchan mek thu an hruaitute’n an sawi.
April ni 9-ah MCPA hi an thukhawm dawn a, hei hi an thutkhawm hun pangngai a ni. April ni 23-ah General Body Meeting an nei dawn bawk. Hengah hian MUHCS chungchang hi an sawi an rin thu an sawi.
An pawl president Prof Lianzela chuan a hma chuan thla tina Rs 1000 thawh leh Rs 500 thawh an awm a, hei hi MUHCS 2.0-ah tihtawp niin, Rs 1000 thawh tura hrut rual an ni a, chu chu siamthat an duh thu a sawi. A hmain an chhungte an bill kep thei a, tunah erawh chutiang a nih tawh loh thu sawiin, naupang, anmahnia innghatte pawh an bill kep thei tawh dawn lo a, a hrana an inziahluh zel a ngai dawn tih te, nupaa pension te pawhin a hrana an inziahluh zel a ngai dawn tih sawiin, chu chu an tan a rit a, siamthat ni se an duh tih a sawi bawk.
“Rilru han nat ve deuhna te pawh kan nei a, pensioner-te hi kawng hrang hrangin min discriminate tlat hi a pawi kan ti a,” a ti a, “Min discriminate zawngin sorkar lam hian thil an sawi a, ‘pensioner-te thawh chu cheng vaibelchhe 9 vel, an hman chu cheng vaibelchhe 27 leh 28 vel’ tih te an sawi a. Engatinge kan lakah hian sumdawng rilru an put tlat mai le ti te pawhin a ngaihtuah theih a,” tiin, “Sumdawng rilru kan laka pu lo turah sorkar hi kan beisei a. Tihah chuan pensioner-te chu kum upa lam kan ni a, bill tur pawh ngah tura ngaih kan ni ang chu,” a ti. Mi dang zawng tan card siam tur tih a nih laia pensioner-te tana siam ve loh tur tih a nih thu a sawi bawk.
Prof Lianzela chuan a tirah chuan sorkar hian pensioner-te hi MUHCS kalphung duang tur thlengin a sawm tih a sawi a, “1.0-ah khan a ngaihtuahnaah min sawm thin a, khatih lai khan kan pawisa pawh sorkar hian a mamawh ve a, an it a ni. Kan thawh tawh a, ADB atangin loan an puk thei tawh a, chutiang atan chuan kan contribution kha an mamawh thin a, zawm turin a thlemin min thlem a ni. Tunah erawh an duh dan danin kan chungchang an rel ta mai a,” a ti.
“Sorkar chuan a plan-sakate nen an ngaihtuah ang a, an relho tur a ni a. Chutianga ti lovin an duh dan danin an ti a, min barh lui ta a,” a ti bawk.
Lungawi lova a nawra innawr zawnga kal chu an rilruah a awm lo tih a sawi a, an tana ruahmanna siamah an duh dan an thlen ve chu an tih turah ngaiin, chutiang chuan sorkar ngaichang chungin an kal tih a sawi.
2025-26 chhung khan pensioner-te zingah Category A-ah mi 8548 te’n thla tin Rs 1000 an chawi a, Category B te’n thla tin Rs 5000 an chawi thin. An pawisa thawh hi Rs 7,26,79,410 vel a ni.
Pensioner-te’n MUHCS-ah sorkar ngaichang
