Mizoram Universal Health Care Scheme (MUHCS) chungchangah Mizoram Civil Pensioners Association (MCPA) te’n sorkar an ngaichang a, AMC inthlan avanga model code of conduct puan, phelh a nih hunah thuneitute nena sawihona hun tha a awm an beisei.
MCPA hian hi MUHCS 2.0-a an dinhmunah an lungawi lo a, a hmaa an dinhmun aiin a tha lo tiin, siamtha turin thuneitute an ngen a ni.
April ni 23 khan Vanapa Hall-ah Assembly an nei a, hetah hian an general secretary-in MUHCS 2.0 chungchanga an hmalakna a sawi a, MUHCS 2.0-a an dinhmun chhe tak siamthat theihna tura Working Committee on MUHCS hmalakna sawiin, health minister leh home minister an hmuh thu leh AMC inthlan vanga model code of conduct-in a phuar avanga thutlukna
siam a awm loh thu te, model code of conduct awm tawh loh hnuah hun remchang tha tak nei a, an harsatna chinfelna kawnga sawihona hun tha tak a awm ngei a rin thu a sawi.
Assembly-ah an member chatuan ram pan ta mi 533-te sunna hun an hmang a, palai zinga kum 90 chung lam mi parukte chawimawina thilpek an hlan.
2026-28 chhunga an pawl hruaitu tur an thlang a, president atan Prof Lianzela, vice president atan F Vanlalruata leh Lalkanglova Sailo te an thlang.
Pensioner-te’n sorkar ngaichang
