Pezeshkian lakah beiseina sang

Iranian parliament moderate member Masoud Pezeshkian chuan a tumpui hardline conservative candidate chu hnehin Iran president atana thlantlin a i.
Tihian kum 69-a upa hian thla kaltaa helicopter chesuala thi Ebrahim Raisi a thlak dawn ta a ni.
Pezeshkian hi thalai lamin an thlawp nasa hle a, inthlan result tihchian a nih hma pawhin capital tehran kawtthlerah pungkhawma zai leh lamin hun an hmang tawh.
Pezeshkian chakna hian Iran thalaiteah beiseina a siama ngaih a ni a, ni lo se chuan Iranian thlai tam tak chuan an ram chhuahsana ram danga chen an tum tia sawi a ni bawk.
Kum 2008 atang khan Iranian parliament ah Tabriz city aiawha tel tan tawh niin health minister pawh lo ni tawh a ni a.
Kum 1990 chho khan a nupui leh a fa pakhat chu car accident ah an borial a, nupui nei nawn tawh lovin a fa la dam mipa pahih leh hmeichhia pakhat te chu a enkawl a ni.
Pezeshkian chkana hian Islamic hardliner te Raisi thlak tur conservative dang dah an tumna chu a tibahlah hneh hle a. Conservative te chuan supreme leader Ayatollah Ali Khamenei thawhpui tur Irana thuneihna tin thunun vek an tum a ni.
Kum 48-a upa Fatemeh chuan Pezeshkian a vote na chhan chu hmeichhia leh mipui te rights a ngai pawimawh tiin a sawi a.
Kum 37 a upa Afarin thung chuan, “Pezeshkian hi president thilti thei lo tak a ni dawn tih ka hria, tichung chuan hardliner te ai chuan a la tha fe zawk” tiin a sawi bawk.
Kumin Iranian president thlanna neihah first round vote thlakah vote a tlachhe hle a, vote tlakchhiatna chhan hi mipui nawlpui te rahbeha an awm nia inngaihna leh khawvel ram dang te nena inbakaiha hrek an nih reng an hne zia lantirna anga ngaih a ni a.
Chumai bakah president thlanah duhthlantur canddiate tlem lutuk chu an duhlohzia an lantirna ni bawka ngaih niin candidtae paruk awmah panga chu hardline islamists te vek an ni.
Chung te bakah sorkar policy tinah Ayatollah Khamenei chu a tawpa thutlukna siamtu tho a nih zel avangin president chuan engmah ti tak tak thei lovah an ngaih vang a ni bawk.
Inthlana vote thlak duh lo pakhat kum 35 a upa HR manager leh activist Tehran a cheng Azad chuan tun hma in sorkar a sawisel avangin tum hnih lung ina khung anih tawh thu a sawi a.
Dr Pezeshkian chuan chakna chang mahse supreme leader chu Iran a engkim chunga roreltu a la ni tho a ti a. “Islamic Revolution atangin kum 45 hmel kan hmu tawh a, political structure reform a la awm chuang lo” tiin a sawi.
Iranian mipui tam tak te chuan hardline candidate Jalili a chak loh nan hrim hrim Dr Pezeshkian chu an vote tia sawi niin president thlan thawhkhatna aiin a thawh hnihnaah chuan vote a tla tha zawk hle reng a ni.
Jalili chu anti-Western bur niin a campaign naah pawh khawthlang ram te sawisel chu thupui bera a neih niin kum 2015 Tehran nuclear deal a sawisel nasa bawk a. Voters te chuan Jalili a tling a nih chuan US leh regional allies te nena inbakaihna zualkai zawkin Iran economy-in a tawrh belh nasat an hlau a ni.
Chutih laiin Dr Pezeshkian thung chuan Khawthlang ram te nena inzawmna tha leh mumal neih a aupui thung a, Iran hnuchhawna awm mek a nihna ata khaichhuah a aupui bawk a. Iran economy chu hrekna nasa takin a chiah reng chuan a kal zel thei lo tiin a sawi.
Pezeshkian chuan Iran in a kalpui mek hmeichhia te hmaikhuh vektur ‘hijab rules’ chu a duh lo bawk a. Hijab rules bawhchhia tia puha police custody a a awm laia thi Mahsa Amini thihna pawh a sun thu lo sawi tawh a ni bawk.
Pezeshkian chuan nuclear deal tharthawh leh hrekna Iran in a tawrh mek tihzalen bakah Iran chuan international banking convention a zawm ve tawh ang a ti bawk. Hei tak hi conservative tena an kalpui duh loh niin chu chuan Iran chu harsatna hrang hrang a siam zawk a ni.
Heng bakah hian Pezeshkian chuan internet censor tam lutuk chu a nuaibo tur thu a sawi bawk a ni. Mahse, a tak takah danglamna a siam thei ang em tih chu hriat a ni lo thung.
Iranian system hrim hrim chu conservative rual tena an la thunun vek a ni tlat a, Iranina president chuan economic portfolio bak chu a duh ang thala a siam danglam theih tur a awm vak lo tia sawi a ni bawk.