Sap rama football eizawnna atana hmangte intelkhawm pawl Professional Footballers’ Association (PFA) an tih chuan an kum tin dan angin 2025-26 season atana PFA award an semchhuak leh ta a, Manchester United player Bruno Fernandes chu mipa lama ‘PFA Player of the Year’ niin, hmeichhe lamah award kawl mektu Manchester City forward Khadija Shaw bawk thlan nawn leh a ni.
Professional Footballers’ Association Player of the Year award hi kum 2007 leh 2008 khan kum zawnin khatih laia Manchester United attacker hmuhnawm Cristiano Ronaldo khan a lo dawng tawh a, tun tuma dawngtu Fernandes hi Portuguese player zinga he chawimawina khum thei pahnihna chiah a ni.
Mipa lama PFA Player of the Year chawimawina khumtu Fernandes hian 2025-26 season-ah khan league goal kua a thun bakah season khat chhunga assist siam hnem kawngah Premier League record thar (21) a siam bawk.
Khati khawpa England lama assist nei thei si tun World Cup-a an hmatawng lian Ronaldo goal thun tur a chhawpsak tha duh lo kha chuan sawi a hlawh ve hat a, Portugal captain pawhin a nupui neihnaah a sawm lo tih thawmte hriat tur a awm chho ta zel a nih kha!
Fernandes hi kum 2010-a dawngtu Wayne Rooney hnu lama Manchester United player zinga an professional-puite’n player tha bera an thlan chhuah ni thei leh hmasaber a ni.
Men’s annual award hi PFA member-te thlan niin, kumin hi United player 12-in award an dawn tlinna chiah niin, England leh Wales ram chhungah club malkhaia he award hui hnem ber an ni.
Kum 31-a upa Fernandes hi coach Michael Carrick-a hnuaiah season liamta khan a vul chuk a, amah avangin United hmatawng palite khan goal bawh turin zalenna thuk zawk an neih theih phah a ni.
Kumin February thla daih tawh khan Carrick chuan attacking midfielder fakin, “Bruno hian boruak siam a thiam a, a fing var a, pianpoui BA (natural brain!) kan tih ang kha a nei,” tiin a lo fak tawh!
Red Devils tan goal 110 thuna assist ngawt pawh tum 106 tehreng ngah tling tawh Fernandes hian Premier League era bikah match 314 lek chhungin goal leh assist belhkhawm tum 200 a nei tling der tawh a, match 295 leka he mellung phun hmasa Rooney hnu lama United player zinga belhkhawm goal 200 tlin leh rang ber a ni nghal.
Mancherster United chu eng trophy mah lakpui zo lo mah se mimalin a langsar a, Premier League campaign vawi khata assist siam hnem kawngah tunhma lama record chelhtu Kevin de Bruyne leh Thierry Henry-te a hmakhalh hial a ni!
Club captain Fernandes hian kum 2020 khan United zawmin, season liamta khan Old Trafford club chu English top flight-ah pathumna a nihpui.
January 2020-a Sporting Lisbon atanga an lei chhuah Fernandes hian award thlan vote thlakah Arsenal trio Gabriel Magalhaes, David Raya leh Declan Rice-te bakah Manchester City attacker pahnih Cherki leh Erling Haaland-te a hmakhalh thei ngat a ni.
Mipa award leh hmeichhe award dawngtu Fernandes leh Shaw-te hi a hma lawk khan Football Writers’ Association chuan 2025-26 season atan men’s leh women’s footballers of the year atan an lo puang tawh bawk.
Season thum chhunga a tum hnihna atana hmeichhe award dawng thei Shaw hian a zawn zatin Women’s Super League (WSL) golden boot pawh a dawng thei ngat a, season liamtaa a goal 21 tihluh hmangin Manchester City a champion-pui.
Young player award ve thung
Manchester City left back kum 21 mi Nico O’Reilly chu mipa lama Young Player of the Year award dawngtu niin, hmeichhe lamah Arsenal striker Olivia Smith chuan kum zawnin he chawimawina hi a dawng ve bawk.
England international O’Reilly hian season liamta khan inelna hrang hrangah belhkhawmin City tan game 53 a khel tling a, goal kua a tilut tling bawk.
City defender Nico O’Reilly ren tin daih (versatile) kan tih ang kha niin, kum heti zat lekah starting XI hmun nghet a chang pha der tawh a ni!
Season liamta khan league match 34 khelin, tah chuan goal riatah inrawlhna a nei a, he ti zat league game-ah hian a khelh tumin goal chhuah loh tum kua an nei tling a; League Cup final-a City-in Arsenal an hneh tumin player of the match atan thlan a ni nghe nghe.
He contributed eight goal involvements (five goals) and nine clean sheets in 34 league outings, scoring twice, and was named player of the match as City beat Arsenal in the League Cup final.
Kum 22-a upa Canada international Smith hi England international Lauren Hemp tih loha women’s young player of the year vawi khat aia tam ni thei awmchhun niin, nikum nipui laia pound maktaduai 1-a Gunners-in Liverpool atanga an lei chhuah hnu khan inelna hrang hrangah belhkhawmin goal 10 a thun tling.
PFA Premier League Team of the Year
Goalkeeper: David Raya (Arsenal).
Defenders: Gabriel Magalhaes (Arsenal), Nico O’Reilly (Manchester City), William Saliba (Arsenal), Jurrien Timber (Arsenal).
Midfielders: Bruno Fernandes (Manchester United), Declan Rice (Arsenal), Rayan Cherki (Manchester City).
Forwards: Erling Haaland (Manchester City), Antoine Semenyo (Manchester City), Igor Thiago (Brentford).
WSL team of the year:
Hannah Hampton (Chelsea); Kerstin Casparij (Man City), Toko Koga (Tottenham), Ellie Carpenter (Chelsea), Emily Fox (Arsenal); Yui Hasegawa (Man City), Mariona Caldentey (Arsenal), Jess Park (Man United); Bunny Shaw (Man City), Alessia Russo (Arsenal), Lauren James (Chelsea).