PHE tui semna pipe-a leak a awmin, mipuiin an report thuai theihna tur mobile application an siam thar a. Hetianga report tam thei hnenah incentive award pawh siamsak an tum.
PHE department hian tui pipe leak report-na tur, ‘water leak reporter’ tih an siamthar a; playstore atanga app hi download theih niin, report dan tur leh hriat tur tul chu app-ah hian dah nghal a ni. He mobile app hi Ningani khan PHE minister Prof Lalnilawma chuan a tlangzarh a ni.
PHE minister chuan, tui pipe leak hian tui pump sa tam tak a thamral tir a. Chu mai niloin, lei min/chet theihna chance a siam tam bawk. Report an dawn ang chu theih ang angin an bawhzui thin na a, hmuh kim loh a tam thei a, he harsatna hi chinfel ngai an ti a, Consumer Union pawhin an vei a, kumin May atang khan hma an la tan ta tih a sawi a ni.
Mipuiin tui leak an rawn thlen thuai theih nan reporting system neih ngai a ni, tiin Buannel Geo Solutions-in an ruahman sak tih a sawi. Thla laka whatsapp-a thawn hnu ah a bialtu JE-in geo tagging atangin a lo hmu nghal anga, a leak-na bawrah rawng hran bik siamin, siamthat a nih hma chuan he rawng hi a awm dawn a, siamthat hnu ah rawng hi a inthlak leh mai dawn tih a sawi a ni.
“Hei hi hman tangkai chuan tui leak kan hum tam thei anga, amaherawh chu mipui nen thawh ho that a ngai dawn. Mipuiin an report that loh chuan department tan hmuh sen a ni dawn lo. A application hi download tur niin, mitin tana download theih turin rit lo taka siam a ni. Aizawlah hman chhin a ni anga, kan hman tangkai dan azirin khawpui danga la tih zel tum a ni ang,” Prof Lalnilawma hian a ti.
PHE engineer in chief Lalrothanga sawi danin, app hi Mb 12 chauh niin, mobile storage leh RAM ei hek tham a ni loa, hman awlsam taka siam niin, download hnu hian app first page hnuaiah a hman dan link a awm a, tui leak-na lai chu thla lak a, thehluh mai tur a ni. He app hmang lo pawh hian, phone hmang pawhin a report theih a. A report theihna chu landline number – 0389 2329909 a ni.
PHE-in pipe leak report-na siam Hrilh tam thei tan lawmman siam
