Philippines in beih a tawh chuan US in a pui ang : Joe Biden

President Joe Biden chuan South China Sea a Philippines in beih a tawk a nih chuan Manila chhanin US a penchhuak nghal dawn tiin a sawi.
Biden hian tun hnaia Chinese leh Philippines coast guard vessels te intihbuai reng karah tawngkam chhuak a nei ta a, China leh Philippines te hian tuipui ram an inchuh a ni.
US leh Philppines te hian kum 1951 atang tawh khan defence treaty an nei tawh a. China chuan helai bial vela boruak titangtuah US chu a puh ve thung.
White House a Japanese Prime Minister Fumio Kishida leh Philippine President Ferdinand Marcos Jr te nena inbiakna an neihnaah Biden chuan ‘South China Sea a Philippines aircraft,vessels leh armed forces ten beih an tawk a nih chuan kan defence treaty angin kan che nghal ang’ tiin a sawi.
Marcos-an US a pan hma hian Philippines chuan Chinese vessels te chu Second Thomas Shoal, Spratly Islandbula tuipui ram inchuhah hlauhawm tak taka chetlaah a puh a ni.
Chinese ship pakhat chuan tihthaihin a chang leh water cannon leh Philippines ship te a kap thin bawk.
Ram pathum hruaitute chuan hminghmerha China sawi lang si lovin rules-based international order kengkawh an tum tlat tiin an sawi a ni.
China erawh chuan tum tam tak South China Sea a a chetlak dan sawiselna chu hnawlin US zawk chu Indo-Pacific boruak muanawm lova siamtu a ni a ti ve thung a.
“Tumahin China in territorial sovereignty leh maritime rights leh interests a neih te an bawhchhe tur a ni lo, China chuan a dikna humhim turin chak takin hma a la zel ang” tiin Chinese foreign ministry thupuangtu Mao Ning chuan a sawi.
Ram pathum hruaituten inbiakna an neih hma lawk hian Biden leh Kishida te chuan inbiakna neiin US leh Japan chuan thawhhona thuthlung pawimawh tak tak an ziak a. Chung zingah chuan defence lama chak zawka thawhdun a tel.
Ruahmanna an siamah air defence network tihlen tumin Australia telh a ni dawn bawk a, US leh Japan chuan joint command structure an siam bawk ang. Hei bakah hian US leh Japanese sipai te chuan UK sipai te nen military exercise an nei ho dawn bawk a ni.