Tourism department bultumin Thawhlehni khan Phuaibuangah ‘Tlaizawng Paradise’ neih tan a ni a. Chalfilh bialtu MLA, Assembly speaker Lalbiakzama’n Tuivai leiah a hawng.
Assembly speaker chuan leilung hausakna leh mawina hmanga zinmite hip thei tura Phuaibuang khuaa ‘Tlaizawng Paradise’ buatsaih a ni chu lawmawm a tih thu a sawi a. He khua mawina hluta tlawhtu mikhualte lawm taka dawnsawn thiam a pawimawh, tiin, chumi tur chuan khawtlang tanrual leh thawhho that a ngai tih a sawi a ni.
Tourism minister Lalnghinglova Hmar chuan, Tlaizawng Paradise buatsaih hian Phuaibuang leh a chhehvel khaw hrang hrang tan, zinmite kaltlangin, kawng engemaw tala hlawkna an hmuh a beisei tih a sawi. “Kan leilung hausakna humhalh chung si a, zinmite hip thei tura kan ram mawina hman thiam deuh deuh a pawimawh a ni,” a ti.
A hawnnaah hian Phuaibuang leh Luangpawn khawtlang hruaitute leh chhimtu thahnem tak an tel a. Tuivai lei bul, sangha humhalhna pawnah a vawikhatna atan ‘Nghakuai chiah runpui’ buatsaih a ni a, mi 600 velin nghakuai an chiah a ni.
January 6 leh 7 chhunga ‘Tlaizawng Paradise’ neihah hian Tuivaia nghakuai chiah runpui bakah Phuaibuang khaw chhehvela puk leh tlang tlawhchhuahna hun, adventure tourism buatsaih a ni a, Thawhlehni zan khan Phuaibuang field-ah khaw mipui kutchhuak thil chi hrang hrang lei theiha phochhuah niin, zai leh lam entir a ni bawk.
Phuaibuangah ‘Tlaizawng Paradise’
