Ningani zan khan Europe khawmual atanga Fifa World Cup 2026 khel tur zawnna hnuhnung lam semi-final khelh a ni a, Denmark chuan an mikhual North Macedonia chu 4-0 in an hneh a, awlsam takin hnehna an chang. Denmark rual hian Sweden pawh in Viktor Gyokeres hattrick hmangin Ukraine an hneh ve bawk.
Parken Stadium-ah North Macedoni an mikhual. An mikhual lakah ngei tumin thapui an thawh a, an mahni tantute au thawm ring takin a fuih phur a, an mualah an khel tha hle. Hamleta te ram Denmark hian an mikhual North Macedoni nawr na viau mah se beisei angin goal an thun hma thei bik lova, chawlhlawk hmain goal lut a awm thei lo.
Chawlhlawh hmain goal lut awm thei lo mah se chawlhlawk hnu lamah goal thun ngei tumin Denmark in tan an khawh nasa leh zual a, hma takah goal thunin, goal li ngawt an thun ta hial bawk. Team huaisen leh thawkrim tia hriat thin Denmark tan hian Mikkel Damsgaard chuan season half tan atanga minute lina lekah hmahruaina goal thun. He goal hian a fuih phur viau a, inrintawkna sang zawk nena inlan chhunzawmin goal pawh an thun belh ta zawt zawt.
Damsgaard-a’n hmahruaina goal a thun hnuin Gustav Isaksen chuan minute 58-na lekah an goal hnihna thunin an hmahruaina a tizau. Goal hnih an thun vangin phur namen lovin Denmark an phur a, an mikhual North Macedonia erawh chu buai namen lovin an buai ve thung. An mikhualte an talbuai zual lai chuhin Denmark in thapui an thawh chhunzawm a, an goal hnihna an thun atanga minute khat pawh tling loah Isaksen chuan an goal thumna a thun zui leh zat a, Denmark hi an mualah an chak dawn tih a chiang thawkhat viau tawh.
4-0 ngawtin hmahruai tawh mah se Denmark in an la duh tawk mai lo, goal thun belh tuma tan khawh zui lehin Christian Nørgaard chuan minute 75-naah an goal lina a thun zui leh a, an chakna a nemnghet. Norgaard goal thun hnuin goal dang a luh belh theih tawh lova, Denmark chuan an mualah 4-0 ngawta hnehna changin semi-final an inhlangkai zui ta a ni. Denmark hian semi-final ah Czechia an hmachhawn zui leh ang.
Denmark laka fiahna hautak hmachhawn tur Czechia hian Republic of Ireland lakah si hnih an phurh hmasak zet hnuin tlawm an pumpelh hram a. Hun pangngaiah 2-2 a an inhnehtawk hnuin penalty shoot-out ah vannei zawkah an tang zui leh a, mak leh ropui taka semi-final lutin World Cup an hnaih leh zual.
Republic of Ireland hian mikhual an nihna hmunah bul an tan tha a, minute 19-na lekah penalty an hlawhchhuak. He penalty hi Troy Parrott chuan chuan a pet goal a, hmahruaina goal a thun. Hmahruaina goal an thun hnu lawkah Czechia an vanduai nawn leh a an player Matej Kovar chuan minute 23-naah an lamah a ti-goal a, mikhual team goal hnihna a thunsak.
An mualah si hnih ngawta an hnufual hnuin Czechia in goal thun ngei tumin tan an khawh thar a, minute 27-naah penalty an hmu. He penalty hi Patrik Schick chuan pet goal in an si phurh a sut then. An si phur sut then bawk mah se hun rei tak chhung goal an thun belh thei lova, an mualah an tlawm teuh hle, Goal lut a awm belh theih loh reng hnuin hun tawp dawn hnaih minute 86-naah Ladislav Krejcí chuan goal thunin an si phurh a sut zo ta nge nge. 2-2 a nih hnuin goal thun belh thei an awm tawh lova, tie-break hmanga thelh an ngai. Tie-break-ah hian mualneitu Czechia hi 4-3 in an chungnung a, semi-final an lut zui ta a ni.
Gyokeres a vul
Ningani zana inkhel dangah Sweden chuan mikhual an nihna hmunah Ukraine chu 3-1 in an hneh. Sweden an hian Arsenal forward Viktor Gyokeres a vul viau a, goal thum thunin lungthu a kim.
Ukraine leh Sweden te hi tualdawih khelmual Estadi Ciutat de València-ah an inhmachhawn. Sweden in bul an tan tha a, inkhel tan atanga minute 6-na lekah Viktor Gyokeres chuan hmahruaina goal a thun nghal. Hma takah goal thun bawk mah se goal dang an thun belh thei lawk lo thung a, goal thun belh turin chawlhlawk an nghah a ngai.
Chawlhlawk hnu lamah Sweden an khel tha zui leh a, goal hmahruai thuntu Gyokere chuan minute 51-naah an goal hnihna thuni an hmahruaina a tihzau belh. Si hnih an phurh tawh vangin Ukraine in goal thun mamawh viau mah se an chesual chhunzawm leh ta zel a, penalty an chawi. He penalty hi goal hnih thun tawh Viktor Gyokeres chuan a lungthu kim nan a pet goal a, an hmahruaina a tizau. Arsenal forward Gyokeres hian World Cup 2026 khel tur zawnna qualifying round neih chhungin goal a thun miah lo a. Play-off semi-final ah erawh goal thum ngawt a thun ta thung a, a hunah par chhuangin arawn vul thar ve leh ta a ni. Ukraine tan hian Matvii Ponomarenko chuan hun tawp dawn hnaih minute 90-naah goal thun bawk mah se result tidanglam turin awmzia a nei thei tawh lo thung.
Play-off ah Denmark an chak awlsam
