Thawhtan zinga NBA regular season khelhah New York Knicks chuan an khingpui Washington Wizards chu point 118-109 in an hneh a, play-off khel turin an tling. Inkhel dangah Toronto Raptors chuan Charlotte Hornets an hneh a, play-in khel turin an tling chiang ve bawk.
Eastern conference-ah pangana ni mek New York Knicks hian table hnuai lama awm Washington Wizards lakah bul an tan tha a, quarter khatnaah point 34 zet an thawkchhuak a, point thumin sang zawkah an tang nghal. Quarter hnihnaah Wizards an khel tha ve thung a, point 11 zeta chungnung zawkin, point sariha hmahruai chungin chawlhlawk an hmang.
Chawlhlawk hnu lamah Knicks an khel tha leh nghal chat a, quarther thumnaah point 15 zetin an chungnung a, an khingpuite an lehthal. Quarter hnuhnung berah Knicks hi point hnihin an chungnung zui leh a, point 9 in hnehna an chang zui ta a ni. Wizards laka hnehna an chan vangin New York Knicks hian pangana an luah nghet a, play-off khel turin an tling chiang nghal. Play-off khel tura Knicks an tlin chian laiin Washington Wizards hi 11-naah an tawlh hnung a, play-in khel phak lovin an awm ve thung.
Wizards lakah hnehna pawimawh tak an chan tum hian Knicks tan Quentin Grimes leh Jalen Brunson ten point 27 ve ve an thawkchhuak a, a zawna vawi li an chak theih nan an thawhhlawk dun hle.
Thawhtan zinga inkhel dangah Toronto Raptors chuan point 128-108 in Charlotte Hornets an hneh a, play-in khel turin an tling chiang nghal. NBA regular season 2022-23 hi April ni 9-ah khelh zawh a ni dawn a. April ni 11-14 chhungin play-off khel tur zawnna ‘Play-in’ khelh tan a ni ang a. April ni 15 atangin conference play-off khelh tan a ni ang. Conference pahnih; Eatern leh Eastern conference-a a sang parukte play-off khel turin an tling chiang nghal a. Pasarihna atanga sawmna ten play-off khel phak tur zawngin ‘play’in’ an khel zui ve leh ang.
Play-off khel tur Knicks
