PM hlui, Gandhi pahnih lim susam vangin Bengal-ah boruak sang
West Bengal-a Asansol-ah prime minister hlui pahnih, Indira Gandhi leh Rajiv Gandhi lim sawisak a nih avangin politics-a inbeihna boruak a san phah hle.
Tual chhung BJP pisa bul lawka lawm milim pahnihte hi suasam nia sawi a nih hnuah Congress thalai chuan a lungawi lohna an lantir a. Nilaini zan dar 11:30 atang khan Asansol-Purulia State Highway chu dangin Ningani chawhnu dar 02:00-ah an hawng chauh va. Milimte hi BJP leh Trinamool Congress worker-te suasamah an puh bawk.
Police station-ah ziakin thubuai an thehlut a. Police chuan a titute man chhuah ngei an tum a, milim pawh darkar 24 chhunga a ngai anga tun din leh hman an tum a. Hetianga intiamna a awm hnuah lungawi lohna lantirtute hian an kawng dan an hawng chauh a ni.
Congress district president Debesh Chakravarty-a chuan milim sawisak a ni hi a dem hle tih a sawi a, “Nikumah pawh hetiang hi a thleng tawh a. Police-in darkar 24 chhunga chin fel vek an intiam laiin tumah tun thlengin man an la nei lo va. Tun tumah pawh hian a titute man chhuah an nih loh chuan Kulti Police Station tualah lungawi lohna kan lantir ang,” a ti.
BJP hruaitute chuan Congress puhna hi an pha ve thung a. Tual chhung BJP hruaitu, Abhijit Acharya-a chuan, “Tun din hi kan duh a, tihchhiat hi kan hawi lam a ni ve lo. Heng milim dinte pawh hi kan pawmpui thlap a ni a. A chhuinaa a tangkai takin tiin CCTV footage pawh police hnenah kan hlan a. Heti chung hian tumah man an la awm lo zel a. Congress leh Trinamool hian he thil thleng hi politics-a inbeihna leh thangthat lak nan hman an tum a ni,” a ti.
Mamata Bannerjee-i kaihhruai Trinamool Congress rorelna, Bengal hi nakuma inthlang mai tawh tur a ni.
PM hlui, Gandhi pahnih lim susam vangin Bengal-ah boruak sang
