PM-in an state a tlawh dawn em tih Manipur BJP-in la hre lo

Manipur-a BJP hruaitu hlun tak chuan Prime Minister Narendra Modi-in an state a tlawh dawn nia sawi rik awm mek chungchangah an party chuan chiang taka thu dawn an neih loh thu a sawi.
“Sorkar atanga hriattirna emaw, prime minister-in Manipur a tlawh dawn tih emaw engmah chiang taka hriatna leh dawn kan la nei lo va; mahse, a lo kal a nih chuan kan buaina hmeh mihna tur hi a lo keng ngei ang,” tiin Manipur BJP General Secretary K Sarat Kumar-a chuan Nilaini khan a sawi.
An state tlawh ta se, a tlawh hun chungchang zawhnaah Sarat Kumar-a chuan, “Hemi chungchangah hian kei chuan ngaihdan ka nei lo, sorkar laipuiin an duh a nih phawt chuan eng thil pawh eng hunah pawh thleng thei a ni,” a ti.
Manipur-ah hian Prime Minister Modi-a’n an state a tlawh dawn nia thuthar a tam hle a, thuneitute pawh VVIP-in a tlawh tur lo dawngsawng turin an inbuatsaih nia sawi a ni.
Hmarchhak state hi February thlaa chief minister atanga N Biren Singh-a bân hnuah mipui thlan sorkar hnuaia awm loviun President’s Rule-a awm mek an ni.
Sawi dan pakhatah chuan Modi-a hian September 13-ah a tlawh dawn nia tar lan a ni.
Thuthar a awm mek lai hian Congress MP Dr. Angomcha Bimol Akoijam-a chuan prime minister hian an state a tlawh a nih phawt chuan a inlan lawk loh avangin Manipur mipuite lakah ngaihdam a dil ngei tur a ni tih a sawi.
Tar lan tawh thin angin kum 2023 atang khan Manipur-ah hian Meitei–Kuki inkarah buaina chhuakin mi 260 chuang thi an awm tawh a, chenna in chhuahsana tlanchhia mi 60,000 chuang an awm bawk a. Chenna in tam tak hal chhiat niin tlanchhe lo thei lovin mi tam tak an awm.
Tharum thawhna thleng zualpui awm tawh lo mah se boruak a la tang em em reng a. Meitei-te hi an kahwsakna, phaizawl district pawn lamah an lut thei lo va, Kuki-Zo pawh Meitel chennaah an kal thei lo bawk a. An in leh lo chhuahsan tam tak hi tun thlengin an la haw thei lo bawk.
Buaina zualpui reh tawh mah se a boruak thlirin alh chhuak leh thut thei reng dinhmunah a ding a ni.
Kuki-Zo hian sorkar laipui hnuaiah inrelbawlna hran neih an phut a, Meitei pawlte hian an state-a ‘dan lova awm’ an tih, Kuki-Zo zinga mite chu hnawh chhuah an phut bawk a, heng mite hi tharum thawhna tichhuaktuah an puh a ni.
Prime minister hian Inrinni hian Mizoram tlawh tura ruahmanna siam niin state dang atanga an state tlawh theihna tura rel kawng sial thar a hawng dawn a. A haw lamah Manipur hi a tlawh dawn niin thu a thang mek a ni.