PM Modi $5 trillion economy rintlak em?

BRICS Business Forum Leaders’ Dialogue karkalta a Johannesburg khawpuia neihah Prime Minister Narendra Modi chuan, “Hun rei lo te hnuah India chu $5 trillion economy a ni ang,” tiin a sawi a.
Kum 2018 khan Ministry of Commerce and Industry hnuaia working group te chuan kum 2025 chu $ 5 trillion econmy nih nana hun tiam bitukah an nei a. Mahse, Covid-19 pandemic leng avanga economic slowdown chuan hun tiam siam chu a pawhsei tir ta a ni.
Tunah chuan economy revival a thleng tawh a, Lok Sabha inthlan a hnai tawh bawk a, official te chuan hmalakna kalpui zui zel a ni tawh an ti a. Red Fort atanga 77th Independence a thusawina a neihah Modi chuan India chu kum 2014 khan khawvela economy lian ber 10-na a ni a ti a, tunah chuan pangana a ni tawh a ti bawk a. Chutah a ‘term thumna’ a chelh hunah chuan India chu khawvela economy lian ber pathumna a ni ang a ti.
Politics thila insawina ang zawnga ngaihsak loh pawh nise Prime Minister Modi thusawi chuan sawi zui a hlawh tlat thung.
Pakhatnaah, Modi chuan ram dangte economy len lam sawi nana an hman thin ang lo takin Indian economy dinhmun sawi nan nominal Gross Domestic Product (GDP) estimates a hmang a. Chu chu a dik lo tih a ni. Nominal GDP chuan kum hata ram chhung tharchhuah chu chu mi kuma a man ang hisapa a tehna tawp a ni a. Mahse, economy len lam leh nihna diktak chu real GDP-ah price change siamrem hnuah chauh a lang thin tih a ni.
A awmzia berah chuan India chu nominal term ang chuan economy output thlak danglam nasa lo pawhin inflation sang tak avangin 5 trillion economy a ni ami ang tih a ni a. Mahse sorkar dang, United Nations leh international agencies heng World Bank leh International Monetary Fund te chuan economic growth chu real GDP (price adjusted) hnuah chauh estimate an siam thin thung a, India sorkar chuan nominal GDP (estimated at current market prices) in a siam a ni.
Pahnihnaah chuan national GDP leh ram dang te khaikhin chu exchange rate conversion avangin sawi lawk thiam har a ni bawk. Researchers te chuan market-based exchange rate te chu national GDP te common currency nena khaikhin nana tlaklohah an ngai a, a chhan ber pawh non-tradeable commodity tam tak a awm a, chubakah market avanga danglam zung zung thei exchange rate ngelnghet lovang an ti bawk.
Nominal GDP ang chuan Indian economy hlutna chu kum 2022 khan $ 3.39 trillion niin khawvelah pangana a ni tiin Modi-an a sawi a. Mahse, real GDP ang chuan india economy kum 2022 a ahlutna tak tak chu $3 trillion niin khawvelah parukna a ni thung. PPP-based GDP estimates ang chuan Indian economy len lam chu kum 2022 khan $10 trillion vel a ni bawk a. India PPP-based GDP chu kum 1990 chho atang khan a lian zual zel a. Kum 2005 khan Germany khum tawhin khawvela economy lian ber palina niin kum 2009 khan Japan khum lehin pathumna a ni zui a, tun thlengin inthlak danglam a la awm lo.
Pathumnaah chuan Modi-an a kaihhruai hnuaiah Indian economy chuan bung thar a kai a tih chu socioecnomic implication nena inkaihhnawih a ni. Economic development zirchianna lamah per capita income leh output te chu standard of living teh nana hman niin economy len lam teh nana hman a ni lo thung. Mipui tam lamah China a khum hnuah India per capita income (Gross National Income or GNI) leh GDP te chu G-20 ram zinga a hniam ber a la ni thung.
Chumi awmzia chu India chu per capita income ang zawnga chhut chuan G20 rama ram rethei ber tihna a ni a. India chu khawvela mihring tamna ber ram a nih tawh avangin India chuan living standard zahawm a mipui nawlpui ten an nei tia a sawi theih nan chuan khawvel economy lian ber pathumna tal a nih a ngai tih a ni. Kum 2021 khan China leh India population chu intluktlang vel a nih laiin China per capita income chu PPP $17,504 a nih laiin India chu PPP $6,590 chauh a ni thung a, Brazil chu PPP $14,370 niin South Africa chu PPP $12,948 a ni thung.
India per capita income hi income insemdarhna intluktlang lo lutuin a tihmelhem bawk a. Kum 2021 khan India pre-tax national income 21.7% lawih chu a mipui 1% te hnena kal niin 13% chauh chu mipui nawkpui 50% te thawh a ni chauh a ni.
India-in China emaw US emaw GDP leh per capita income a tluk a tum a nih chuan tuna a hmalakna zawng aia nasa in physical leh human capital investment nasa zawka tiin resource mobilisation a kalpui a ngai nasa tiin mithiamte chuan an sawi.