‘PM Modi-an Manipur hnungchhawn’ ti

Congress te chuan Manipur atanga an MP pakhat zawk chu Lok Sabha a Prime Minister thusawi hmaa a thusawi phalsak ve lo tiin an lawmloh thu an sawi a. PM Modi chuan a tihthin dan pangngaiin dfiamthu nen mi tielin thu a sawi ang a, mahse, buaina in a nuai Manipur State a legislator thusawi ngaithla turin dawhtheihna a nei lo an ti bawk.
Opposition party Congress te chuan Prime Minister chuan Manipur harsatna tawk mek chu ‘a hnungchhawn zui zel’ tiin an sawi bawk.
Lower House a President Address a Motion of Thanks sawihona chhanna a thusawina minute 135 lai a neihah Modi chu Manipur chungchangah opposition member ten an aukhum nasa hle a.
PM thusawi hma in Leader of Opposition Rahul Gandhi leh Congress te chuan outer Manipur atanga MP Alfred Arthur chu thusawina pek an ngiat a ni.
Congress leader gaurav Gogoi chuan, “Lok Sabha-ah thil duhawmlo tak kan hmu a. Congress leh Rahul Gandhi te chuan Manipur atanga MP pahnih te chu thusawina hun pe turin an gnen a. Rahul Gandhi ngei pawhin tum tam a ngen a ni” tiin a sawi a. Gandhi chuan Manipur buaina chu a hmunah kalchilhin a tlawha civil war ang mai dinhmun a nih a hriat a ni tiin Gogoi chuan a sawi a.
Rahul Gandhi chuan lehlam chauh thlirna leh ngaihdan dawnsawn a nih chuan Parliament leh Manipur mipui te dik lo taka thil hrilhna a thleng thei a ti a ni a ti bawk a.
“Chuvang chuan a nia Imphal leh Inner Manipur atanga kan MP in Thawhtan khan thusawina a nei reng a, tlangram lam aiawh kan MP Alfred chu thusawina hun pe ve se kan ngen a. Vanduaithlak takin Manipur lainat deuha insawi siin Manipur harsatna ngaihthlak an duh lo” tiin Gogoi chuan a sawi bawk.
“Kan ngiatah khan kan chiang a – prime minister in tlai lam dar 4 ah thu a sawi tan dawn tih kan hria a, chumi hma in minute 2 lek Manipur MP chu thusawina hun nei se kan duh a ni. Mahse, minute hnih pawh pekin kan awm lo va, chumi hnuah darkar hnih vel lai PM in a tihthin dan ngai bawkin fiamthu leh tihelna nen thusawina neiin Manipur MP thusawi ngaithla turin dawhtheihna a nei lo thung” tiin a sawi bawk.
“Prime Minister hian Manipur hi a hnungchhawn niin a lang a. RSS chief Mohan bhagwat pawhin Manipur chungchang a sawi tawh laiin PM Modi chuan ngaihtlak pawh a ngaithla duh lo. Manipur MP te a awm laia an tawng a duh lo a ni ber” tiin Gogoi chuan a sawi bawk.
Thawhtan khan Inner Manipur Lok Sabha member A. Bimol Akoijam chuan thusawina a nei thung a. A thusawiah mi 60,000 chuang dinhmun cheh takah relief camp hrang hrangah an awm mek thu te Manipur harsatna tawh hrang hrang te a sawi chhuak a ni.
Manipur buaina hi nikum May thla atang khan meitei leh Kuki community te intihthiamlohna atanga chhuak a ni a. Khta tang khan buaina avanign mi 200 chuangin nunna an chanphah tawh a, mi sang tam takin in leh lo chan leh chhuahsana awmin chenna in tam tak leh sorkar office halin a awm bawk.