PMAY(G) diltute NGO-in thlang thei lo
– RD minister
Thingtlang lama khawsak harsate in sak tanpuina, PMAY (Gramin) dawngtu tur thlan emaw hnawl emaw chu NGO-ten an lo tih ngawt theih a ni loa, vantlang mipui kalkhawmin an thlitfima an thlanchhuah tur a ni tih Rural Development minister Prof Lalnilawma chuan a sawi.
RD minister sawi danin, tunhnaiah PMAY (Gramin) a dawngtu tur thlan hna kalpui tan a ni a. Hmun thenkhatah a thlangtu atana hman NGO-ten telh duh loh an nei nia sawi a awm a, intelh duh loh ngawt hi a theih loh.
Sawrkar laipuia RD ministry-in tel thei lo tura tehna a neih sa (exclusion criteria) mumal takin a duang a; chumi zinga mi ni lo, India khua leh tui dik, hemi tihchianna atana document – Voter ID, Aadhar adt. nei tan tu pawhin an dil thei tih sawiin, “A dil dan turah form siamsa a awm a, a dil duh apiangin a form hmang hian an dil thei a, mahni bialtu BDO office-ah emaw mahni awmna VC atang pawha lam theih turin ruahmanna siam a ni. Tu pawhin a dil theih rualin, dilna lutkhawm hi khawtlang mipuiiin Gram Sabha-a ngaihtuah a, an thlitfim tur a ni. NGO-in kan en hoa, tia tling loa hnawl nghal an awm nia sawi a awm a, hetiangah hian department-in an hriat chuan hma an la nghal zel a, hei hi a kalphung dik tur a ni lo tih an hrilh. Gram Sabha-ah ministry-in criteria a neih sa hmanga a dawngtu tur hi thliar chauh tur a ni. Heta Gram Sabha-in a pawm chin hi NGO pawhin hriatpuina a ziahsak anga, department-a thehluh tur a ni,” a ti.
Sakhuana vang emaw hnam/ chibil vang emaw political partydang nih vanga indah chhuah ngawt theih a ni lo tih a sawi a ni.
Department-a a luhkhawm hnu ah, a list atang hian department-in survey a nei ve leh dawn tih Prof Lalnilawma hian a sawi a. Tunah hian surveyor pawh an inruat tawh tih a sawi. Hemi atan hian Village Level Administrative Assistant (VLA) an indaih sen loh avangin department-in VC secretary-te a ruat a; a karah VC inthlanpui a lo tlakzel leh hman avangin VC thar a piang a, VC secretary pawh an inthlak a, tuna secretary thar ho chu hemi atan hian ruat zui turin hma an la mek tih a sawi.
PMAY(G) dilna hi kumin March chhunga tihfel vek a, RD ministry website-ah an portal-a thun luh nghal vek tura buaipui zui a ni dawn tih minister hian a sawi bawk.
PMAY(G) diltute NGO-in thlang thei lo – RD minister
