Kolasib District Level Monitoring Committee (DLMC) on PMEGP (Prime Minister’s Employment Generation Programme) chu an chairman, district bawrhsap John LT Sanga hoin Ningani khan an thukhawm.
Chairman chuan mahni kutkea ding tura thiam thil bik hmanga eizawnna leh sumdawnna bul tan turte tan PMEGP kaltlanga hmalakna tur loan pung tlem lak theih a ni chu a tangkai hle tih a sawi a. District mipuiin chhawr tangkai se a duh thu sawiin, a chhawr turten an hriatchian a, tangkai taka an chhawr theih nan nodal agency – Industries, KVIB leh KVIC te chu theihtawp chhuah turin a chah. Bank ho pawh loan pek chhuah chungchangah thahnem ngai lehzual turin a chah bawk.
DLMC hian PMEGP hnuaia hmalakna thlir hoin, awlsam leh felfai zawka PMEGP dilna kalpui a nih theih dan tur, PMEGP diltuten PMEGP an hriatchian hmasak theih nana training buatsaih, a diltu leh nodal agency leh bank lamin harsatna an tawh thin chinfel dan turte an sawi ho.
2023 April 1 atanga 2024 March 1 thlengin Kolasib district-ah nodal agency-ten PMEGP loan dilna 111 dawngin, 109 chu bank lama thawn a ni. Dilna (project) 32 chu bank lamin loan an pe chhuak tawh a. Hemia project senso tur cheng nuai 354.71 ruahmanah bank hian loan cheng nuai 335.81 pe in, sawrkarin subsidy margin money a tum tur zat chu nuai 123.15 a ni. Hemi hun chhung hian PMEGP diltu mi 48 chu EDP training pek an ni bawk.
PMEGP-a hmalakna thlir
